زندگی کے اہم ترین دن کو یادگار بنانے کی خواہش ہر جوڑے کی ہوتی ہے، مگر مصر کے ایک نوبیاہتا جوڑے نے اس خواب کو حقیقت میں ڈھالنے کے لیے ایک ایسا منفرد انداز اپنایا جو نہ صرف ان کی زندگی بلکہ قاہرہ کی گلیوں میں موجود ہر فرد کے لیے بھی ناقابل فراموش بن گیا۔
یہ خوبصورت جوڑا، مصطفیٰ اور یاسمین، قاہرہ کے مرکزی علاقے میں شادی کے دن علی الصبح نکلا۔ روایتی ہالز اور تقریبات سے ہٹ کر، انہوں نے اپنی شادی کی تصاویر شہر کی معروف گلیوں اور چوراہوں میں بنوانے کا فیصلہ کیا۔ مقامی فوٹوگرافر احمد محمد عبدالسید کے مطابق یہ نہایت انوکھا تجربہ تھا۔ مصطفیٰ اور یاسمین کی خواہش تھی کہ وہ قاہرہ کی جیتی جاگتی فضا میں اپنے یادگار لمحات کو قید کریں، اور لوگوں کے درمیان اپنی خوشیوں کو بانٹیں۔
صبح کے چھ بجے شروع ہونے والے اس فوٹو سیشن نے دیکھتے ہی دیکھتے پورے شہر کی توجہ اپنی طرف کھینچ لی۔ کار ڈرائیوروں نے اپنی گاڑیوں کے ہارن بجا کر مبارکباد دی، راہگیروں نے ان کے لیے دعائیں کیں، اور خواتین نے ان کی خوشیوں کے لیے نیک تمنائیں پیش کیں۔ اس جوڑے کی سادگی اور خوش مزاجی نے قاہرہ کے شہریوں کے دل جیت لیے، اور ان کے لیے یہ شادی صرف ایک ذاتی خوشی نہیں رہی بلکہ ایک عوامی جشن بن گئی۔
مصطفیٰ اور یاسمین نے نہ صرف شادی کو ایک دلکش انداز میں منایا بلکہ شادی کے اخراجات کو کم کرکے ان رقم کو ایک اعلیٰ مقصد کے لیے محفوظ کیا۔ انہوں نے فیصلہ کیا کہ وہ اس رقم سے عمرہ کریں گے تاکہ اپنی ازدواجی زندگی کا آغاز برکتوں اور سکون کے ساتھ کر سکیں۔
عبدالسید نے کہا کہ جوڑے کا یہ انوکھا فیصلہ اور عوام کا ردعمل ہر حد سے بڑھ کر حیران کن تھا۔ بغیر کسی دعوت کے لوگوں کی خوشی اور دعائیں اس لمحے کو اور بھی خاص بنا گئیں۔
مصری جوڑے کی یہ سادگی اور محبت بھرا انداز اس بات کا ثبوت ہے کہ خوشی کا اظہار صرف مہنگے اہتمام سے ممکن نہیں، بلکہ دل سے جڑے چھوٹے اور خوبصورت لمحات ہی اصل خوشی کا ذریعہ بن سکتے ہیں۔