ڈونلڈ ٹرمپ کے موسمیاتی تبدیلی کے معاہدے سے امریکی دستبرداری کے اعلان پر چین کا ردعمل آگیا۔
چینی وزارت خارجہ نے امریکا کے موسمیاتی تبدیلی کے معاہدے سے دستبرداری کے فیصلے پر تشویش کا اظہار کرتے ہوئے کہا ہے کہ کوئی بھی ملک موسمیاتی تبدیلی کی تباہ کاریوں سےمحفوظ نہیں، موسمیاتی تبدیلی انسانیت کودرپیش مشترکہ چیلنج ہے۔
وزارت خارجہ نے بیان میں کہا کہ کوئی بھی ملک موسمیاتی تبدیلی سے الگ نہیں رہ سکتا نہ مسئلہ حل کر سکتا ہے چین موسمیاتی تبدیلیوں سے نمٹنے میں مستقل مزاجی سےکام کر رہا ہے، چین مشترکہ طور پر گرین انرجی اور کم کاربن کے اخراج کو فروغ دے گا۔
امریکی صدر ڈونلڈ ٹرمپ نے حلف اٹھاتے ہی اہم اعلانات کر دیے، ان کا کہنا تھا کہ 6 جنوری سمیت دیگر کئی ملزمان کی عام معافی کے اعلانات پر دستخط کرنے جارہے ہیں۔
ٹرمپ نے سابق امریکی صدر بائیڈن کا2030 تک الیکٹرک کاروں کی فروخت کا ہدف50 فیصد کرنے کا آرڈر بھی منسوخ کردیا، اس کے علاوہ انہوں نے اب تک پچھلی حکومت کے کم ازکم 80 ایگزیکٹو آرڈرز منسوخ کردیے۔
اس کے علاوہ ڈونلڈ ٹرمپ نے پیرس ماحولیاتی معاہدے سے علیحدگی کے آرڈرز کے علاوہ فیڈرل ملازمین کی بھرتیاں منجمد کرنے کے آرڈرز پر بھی دستخط کردیے۔