ایپل کی جانب سے اس سال کا سب سے سستا آئی فون جلد ہی مارکیٹ میں متعارف ہونے والا ہے، اور اطلاعات کے مطابق یہ آئی فون ایس ای 4 (یا کچھ لیکس کے مطابق آئی فون 16 ای) ہو سکتا ہے، جس کا متوقع لانچ اپریل 2025 میں ہوگا۔ اس نئے ماڈل کی پہلی جھلک حال ہی میں ایک ایکس (سابقہ ٹوئٹر) صارف کی جانب سے شیئر کی گئی ویڈیو میں دکھائی گئی ہے، جس میں اس فون کا ڈیزائن اور خصوصیات واضح ہو کر سامنے آئی ہیں۔
اس ویڈیو میں دکھایا گیا ہے کہ نئے آئی فون ایس ای 4 کا ڈیزائن کافی حد تک پرانے آئی فون ماڈلز سے مشابہ ہے۔ بیک پر ایک واحد کیمرا بائیں اوپر کونے میں واقع ہے، جس کے ساتھ ایل ای ڈی فلیش بھی موجود ہے۔ اس کے فرنٹ ڈیزائن میں آئی فون 14 سے متاثر ہو کر اسکرین کے اندر فرنٹ کیمرہ نوچ کے ذریعے چھپایا گیا ہے، تاہم یہاں ڈائنامک آئی لینڈ کی جگہ نہیں رکھی گئی۔
جہاں تک اپ گریڈز کا تعلق ہے، اس نئے ماڈل میں آئی فون 14 کی نسبت دو اہم فیچرز شامل کیے گئے ہیں۔ اس کے سائیڈ پر ایک ایکشن بٹن رکھا گیا ہے اور چارجنگ کے لیے یو ایس بی سی پورٹ بھی فراہم کیا گیا ہے، جو ایپل کی جانب سے ایک قابل ذکر تبدیلی ہے۔ اس کے علاوہ، فون میں فزیکل سم سلاٹ بھی دکھایا گیا ہے جو کہ بائیں طرف موجود ہے۔ اس نئے آئی فون میں ایپل کا طاقتور اے 18 چپ اور 8 جی بی ریم کی موجودگی کا امکان ہے، جس سے فون کی کارکردگی میں خاطر خواہ بہتری دیکھنے کو ملے گی۔ بیک پر 48 میگا پکسل کیمرا بھی دیا جائے گا، جو فوٹوگرافی کے شوقین افراد کے لیے خوشخبری ہو سکتی ہے۔
قیمت کے حوالے سے توقع کی جا رہی ہے کہ یہ سستا ترین آئی فون 500 ڈالرز سے شروع ہوگا، جو کہ اس فون کو ایک زبردست ڈیل بنا سکتا ہے۔ جبکہ پاکستان میں اس کی ممکنہ قیمت تقریباً 1 لاکھ 40 ہزار روپے کے قریب ہو سکتی ہے، جو کہ ایک سستا ترین ایپل فون ہونے کے ناطے بہت ہی قابلِ رسائی ہوگا۔اگر آپ ایپل کے جدید ٹیکنالوجی کا تجربہ کرنا چاہتے ہیں مگر قیمت کو مدنظر رکھتے ہوئے، تو یہ فون آپ کے لیے بہترین انتخاب ثابت ہو سکتا ہے۔