انڈین اداکارہ اور ماڈل راکھی ساونت نے پاکستانی اداکار دودی خان سے اپنی تیسری شادی کی تصدیق کر دی ہے۔
ہندوستان ٹائمز کے مطابق راکھی ساونت نے اس بات کی تصدیق کی ہے کہ وہ پاکستانی اداکار اور پولیس افسر دودی خان سے شادی کریں گی۔
راکھی ساونت نے نیوز 18 سے بات کرتے ہوئے اپنی ہونے والی تیسری شادی کے بارے میں بات کی اور اس بات کا بھی انکشاف کیا کہ وہ اور دودی خان ایک دوسرے سے محبت کرتے ہیں۔
راکھی ساونت نے کہا ہے کہ ’وہ (دودی خان) میرا پیار ہیں۔ ہم ایک دوسرے سے پیار کرتے ہیں۔ وہ پاکستان سے ہیں، میں انڈیا سے ہوں تو ہماری لوو میرج ہوگی۔‘
انہوں نے اپنے سابق شوہر عادل درانی پر بھی الزام لگایا کہ وہ اُن کے بارے میں غلط معلومات کو پھیلا رہے ہیں۔
اداکارہ نے کہا کہ ’عادل میری اس شادی سے حسد کرتے ہیں تو وہ سستی شہرت حاصل کر رہے ہیں۔ میرے نام سے وہ سستی شہرت لے رہے ہیں اور میں اس بیوقوف کو سستی شہرت نہیں لینے دوں گی۔‘
اپنے ہونے والے شوہر کے بارے میں بات کرتے ہوئے راکھی ساونت کہتی ہیں کہ ’میں سب کو بتانا چاہتی ہوں، سب لوگ میری شادی کے بارے میں پریشان ہیں۔ میں کہیں بھی شادی کر سکتی ہوں چاہے انڈیا، پاکستان، بھوٹان، امریکہ، لندن اور کینیڈا ہو۔‘
خیال رہے کہ راکھی ساونت نے عادل درانی سے دوسری شادی کی تھی تاہم دونوں نے ایک دوسرے پر سخت الزامات لگانے کے بعد 2023 میں راہیں جدا کر لی تھیں۔
اس سے قبل راکھی ساونت نے 2019 میں رتیش سنگھ سے شادی کی تھی جو کے 2022 میں طلاق کی صورت میں ختم ہوگئی۔