گجرات کی ایک شادی کی تقریب میں اُس وقت غیر متوقع صورتحال پیدا ہوئی جب کھانے کی کمی کی وجہ سے باراتی ناراض ہو گئے اور بارات واپس لے گئے۔ یہ واقعہ سورت کے علاقے لکشمی نگر واڈی وراچھا میں پیش آیا، جہاں دلہن انجلی کماری کی شادی کی تقریب تھی۔ جب کھانے کی کمی پر دولہے کے خاندان نے ناراضگی کا اظہار کیا، تو یہ معاملہ اتنا بڑھ گیا کہ باراتی دلہن کو اپنے ساتھ لے جانے سے انکار کر کے تقریب چھوڑ کر چلے گئے۔
دلہن انجلی کماری اس صورتحال سے انتہائی پریشان ہو گئیں اور فوراً پولیس ہیلپ لائن پر کال کر کے مدد کی درخواست کی۔ پولیس نے فوراً کارروائی کی اور دولہے، راہول پرمود مہانتو اور اس کے خاندان کو پولیس اسٹیشن بلا لیا تاکہ معاملہ سلجھایا جا سکے۔ تھانے میں دونوں خاندانوں کے درمیان مشاورت ہوئی اور جوڑے نے درخواست کی کہ پولیس ان کی باقی رسومات مکمل کرائے، جس پر پولیس افسران نے بارات کے افراد کا کردار ادا کیا اور مالا پہنانے اور وداعی کی تمام رسومات پوری کرائیں۔
پولیس افسران کا کہنا تھا کہ ہمارے پاس 'ویمنز ہیلپ ڈیسک' موجود ہے، اور ہم نے دلہن کی شکایت کے فوراً بعد کارروائی کرتے ہوئے دولہے کے گھر ٹیمیں بھیجیں تاکہ اسے سمجھایا جا سکے کہ ایک چھوٹے سے مسئلے کی وجہ سے شادی ختم کرنا مناسب نہیں۔ اس کے والدین نے اس کی شادی کی مکمل تیاری کی تھی، اس لیے اس موقع پر اس قسم کی صورتحال کا پیدا ہونا کسی بھی طرف سے مناسب نہیں تھا۔
کافی بحث و تکرار کے بعد دولہے اور اس کے خاندان نے شادی جاری رکھنے پر رضامندی ظاہر کی، تاہم وہ واپس شادی ہال جانے کے لیے تیار نہیں تھے کیونکہ انہیں خدشہ تھا کہ دونوں خاندانوں میں مزید جھگڑا ہو سکتا ہے۔ اس کے بعد پولیس نے جوڑے کی درخواست پر تھانے میں ہی شادی کی باقی رسومات مکمل کیں۔ پولیس افسران نے باراتیوں کا کردار ادا کرتے ہوئے مالا اور پھولوں کا انتظام کیا تاکہ شادی کی تقریب خوش اسلوبی سے مکمل ہو سکے۔