آرٹی فیشل انٹیلی جنس (اے آئی) ٹیکنالوجی سے لیس چیٹ بوٹ جیمنائی اب اینڈرائیڈ ڈیوائسز میں گوگل اسسٹنٹ کی جگہ لینے کے لیے مکمل طور پر تیار ہے۔
اس طرح گوگل اسسٹنٹ کے عہد کا اختتام ہونے والا ہے۔
کمپنی کی جانب سے اعلان کیا گیا کہ اینڈرائیڈ فونز میں گوگل اسسٹنٹ کی جگہ جیمنائی کو دی جا رہی ہے۔ ایک بلاگ پوسٹ میں بتایا گیا کہ رواں سال کسی وقت ایسا ہو جائے گا اور آئندہ چند ماہ کے دوران صارفین گوگل اسسٹنٹ کو جیمنائی سے بدل سکیں گے۔
رواں سال کے آخر تک بیشتر موبائل ڈیوائسز پر گوگل اسسٹنٹ تک رسائی ختم ہو جائے گی یا وہ ایپ اسٹورز میں دستیاب نہیں ہوگا۔ کمپنی نے بتایا کہ اس کے علاوہ ہم ٹیبلیٹس، گاڑیوں اور فونز سے مسلک ڈیوائسزجیسے ہیڈ فونز پر بھی اسسٹنٹ کو جیمنائی سے اپ گریڈ کر رہے ہیں۔
گوگل نے بتایا کہ اس حوالے سے مزید تفصیلات آئندہ چند ماہ میں جاری کی جائیں گی اور اس وقت تک گوگل اسسٹنٹ بدستور ڈیوائسز میں کام کرتا رہے گا۔ بلاگ پوسٹ میں بتایا گیا کہ کمپنی کی جانب سے اسسٹنٹ کو مکمل طور پر بند کرنے سے قبل جیمنائی کو زیادہ سے زیادہ بہتر بنائے جائے گا تاکہ صارفین کو گوگل اسسٹنٹ کی کمی محسوس نہ ہو۔
گوگل اسسٹنٹ کی جگہ جیمنائی کو دینا زیادہ حیران کن بھی نہیں کیونکہ کمپنی کی جانب سے اس کا عندیہ پکسل 9 اسمارٹ فون میں جیمنائی کو ڈیفالٹ ورچوئل اسسٹنٹ کی حیثیت دے کر دیا گیا تھا۔