حکام کے مطابق یوکرین کے شہر سُمی پر ایک روسی میزائل حملے میں کم از کم 34 افراد ہلاک ہو گئے، یورپی اور امریکی رہنماؤں نے روس کے تازہ ترین حملے کی مذمت کی۔یوکرینی حکام نے بتایا کہ اتوار کی صبح دو بیلسٹک میزائل روس کی سرحد کے قریب شمال مشرقی شہر کے مرکز میں گرے۔ایمرجنسی سروسز نے بتایا ہے کہ میزائل حملوں میں دو بچوں سمیت 34 افراد ہلاک اور 15 بچوں سمیت 117 زخمی ہوئے۔یوکرین کے صدر زیلنسکی نے کہا ہے کہ روس کے میزائل حملے میں 20 عمارتوں کو نقصان پہنچا ہے۔دوسری جانب امریکی صدر ڈونلڈ ٹرمپ یوکرین پر میزائل حملے کو ’ایک ہولناک واقعہ‘ قرار دیا ہے۔ایئرفورس ون میں صحافیوں سے گفتگو میں صدر ڈونلڈ ٹرمپ نے کہا کہ ’میرے خیال میں یہ بھیانک تھا۔ مجھے بتایا گیا ہے کہ ان سے غلطی ہوئی ہے، لیکن میرے نزدیک یہ ایک ہولناک واقعہ ہے۔ میرے خیال میں جنگ ہی ایک خوفناک چیز ہے۔‘ان سے جب پوچھا گیا کہ ’غلطی‘ سے ان کا کیا مطلب ہے تو ٹرمپ نے کہا کہ انہوں نے غلطی کی۔۔۔ آپ ان سے پوچھیں گے۔‘تاہم انہوں نے واضح نہیں کیا کہ ’انہوں‘ سے ان کی مراد کیا ہے۔اقوام متحدہ کے سیکریٹری جنرل انتونیو گتریس نے حملے کی مذمت کرتے ہوئے کہا ہے کہ یہ حملہ یوکرین کے شہروں پر ہونے والے ایسے ہی دوسرے خطناک حملوں کا تسلسل ہے۔