عازمین حج کو ویکسین کی فراہمی پیر سے شروع ہوگی ۔
پرواز سے دو دن قبل متعلقہ حاجی کیمپ سے ٹکٹ ، ویزہ، شناختی لاکٹ ، اسٹیکرز اور موبائل سم حاصل کرنا ہوگی، وزیر مذہبی امور سردار یوسف کی زیر صدارت اجلاس میں حج انتظامات کا جائزہ لیا گیا۔
وفاقی وزیر مذہبی امور سردار محمد یوسف کے زیر صدارت حج انتظامات کا جائزہ اجلاس میں سیکرٹری مذہبی امور سید عطاء الرحمان سمیت اعلیٰ حکام نے بریفنگ دی۔ وزیر مذہبی امور سردار محمد یوسف نے کہا کہ ضیوف الرحمان کی خدمت کے لیے تمام حاجی کیمپ تیار ہیں، عازمین حج زحمت سے بچنے کے لیے پاک حج ایپ پر دیئے گئے شیڈول کے مطابق حاجی کیمپ آئیں۔
شرکا اجلاس کو بریفنگ دی گئی کہ اسلام آباد، لاہور، پشاور، ملتان میں ویکسین کی فراہمی 21 اپریل سے شروع ہو گی، کراچی، رحیم یار خان، سکھر، فیصل آباد اور سیالکوٹ میں 22 اپریل سے ویکسین فراہمی کا آغاز ہو گا۔
کوئٹہ کے عازمین حج کو لازمی ویکسین لگانے کا آغاز 23 اپریل سے ہو گا، رحیم یارخان کا عارضی حاجی کیمپ 22 تا 24 اپریل کام کرے گا۔ وفاقی وزیر مذہبی امور کو بتایا گیا کہ عازمین کرام متعلقہ حاجی کیمپوں میں لازمی ویکسین، ادویات کی پیکنگ اور حج تحائف وصول کریں گے۔
اجلاس کو بریفنگ دی گئی کہ پرواز سے دو دن قبل متعلقہ حاجی کیمپ سے ٹکٹ، ویزہ، شناختی لاکٹ، اسٹیکرز اور موبائل سم حاصل کرنا ہو گی۔