پاکستان کے آرمی چیف جنرل عاصم منیر نے کہا ہے کہ بیرونی پشت پناہی سے چلنے والی دہشتگردی بلوچستان کی ترقی میں سب سے بڑی رکاوٹ ہے۔
پیر کو راولپنڈی میں فوج کے شعبہ تعلقات عامہ (آئی ایس پی آر) سے جاری کیے گئے بیان کے مطابق آرمی چیف جنرل عاصم منیر نے نیشنل ورکشاپ بلوچستان کے شرکاء سے جی ایچ کیو میں ملاقات کے دوران کہا کہ ’حکومت بلوچستان کی سماجی و معاشی ترقی پر مسلسل توجہ دے رہی ہے۔‘آئی ایس پی آر کے مطابق ورکشاپ میں بلوچستان سے تعلق رکھنے والے مختلف شعبہ ہائے زندگی کے افراد نے بھرپور شرکت کی جبکہ ورکشاپ کا مقصد مستقبل کی قیادت کو قومی و صوبائی امور سے روشناس کرانا ہے۔آرمی چیف نے شرکا کو بتایا کہ بلوچستان کے ترقیاتی منصوبوں کے ثمرات عوام تک پہنچنا شروع ہو گئے ہیں۔بیان کے مطابق جنرل عاصم منیر کا کہنا تھا کہ بلوچ نوجوانوں میں شعور اجاگر کرنے پر سول سوسائٹی کا کردار قابلِ تحسین ہے۔’بلوچ شناخت کے نام پر دہشتگردی پھیلانے والے عناصر بلوچ قوم کی بدنامی کا سبب ہیں۔‘انہوں نے کہا کہ پاکستان کا امن کا عزم برقرار، لیکن خودمختاری پر کوئی سمجھوتہ نہیں کیا جائے گا۔ ’دہشتگردی کو پوری قوم کے اتحاد سے ہی شکست دی جا سکتی ہے۔‘آرمی چیف کا کہنا تھا کہ ’پاکستانی افواج اور ادارے عوام کی حمایت سے دہشتگردی کے خلاف جنگ جاری رکھیں گے۔‘آئی ایس پی آر کے مطابق ورکشاپ کے اختتام پر سوال و جواب کا سیشن بھی ہوا۔