پاکستان فوج کے شعبہ تعلقات عامہ آئی ایس پی آر کے مطابق انڈین حملوں میں 11 فوجی اہلکار اور 40 شہری جان سے گئے۔منگل کو آئی ایس پی آر کی جانب سے بیان میں کہا گیا ہے کہ چھ اور سات مئی کی درمیانی شب انڈین افواج نے بلااشتعال اور قابل مذمت حملے کیے جن میں خواتین، بچوں اور عمر رسیدہ افراد سمیت معصوم شہریوں کو نشانہ بنایا گیا۔بیان کے مطابق ’حملوں کے نتیجے میں سات خواتین اور 15 بچوں سمیت 40 شہری شہید ہوئے۔ 10 خواتین اور 27 بچوں سمیت 121 افراد زخمی ہوئے۔‘بیان میں کہا گیا ہے کہ ’مادر وطن کے دفاع میں پاکستان فوج کے 11 اہلکار شہید اور 78 زخمی ہوگئے۔ پاکستانی آرمی کے چھ اہلکار اور پاکستان ایئرفورس کے پانچ اہلکار شہید ہوئے۔‘بیان میں مزید کہا گیا ہے کہ پاکستانی افواج نے معرکہ حق کے تحت آپریشن بنیان مرصوص کا آغاز کیا اور انڈین جارحیت کا بھرپور جواب دیا گیا۔بیان میں کہا گیا ہے کہ پاکستان کی خودمختاری اور علاقائی سالمیت کے خلاف کسی بھی خطرے کا فوری اور فیصلہ کن جواب دیا جائے گا۔
بیان کے مطابق ’پاکستان آرمی کے شہدا نائیک عبدالرحمان، لانس نائیک دلاور خان، لانس نائیک اکرام اللہ، نائیک وقار خالد، سپاہی محمد عدیل اکبر اور سپاہی نثار شامل ہیں۔‘
’پاکستان ایئرفورس کے شہدا میں سکوارڈرن لیڈر عثمان یوسف، چیف ٹیکنیشن اورنگزیب، سینیئر ٹیکنیشن نجیب، کورپورل ٹیکنیشن فاروق اور سینیئر ٹیکنیشن مبشر شامل ہیں۔‘