کراچی کے پوش علاقے خیابان اتحاد میں ایک لگژری گاڑی میں بیٹھے شخص کی جانب سے ایک عام شہری پر بہیمانہ تشدد کا واقعہ سامنے آیا ہے، جس نے سوشل میڈیا پر غصے کی لہر دوڑا دی ہے۔ واقعے کی ویڈیو وائرل ہونے کے بعد پولیس نے فوری کارروائی کرتے ہوئے حملہ آور کی شناخت کرلی ہے، تاہم وہ تاحال قانون کی گرفت سے باہر ہے۔
ایس ایس پی ساؤتھ، مزمل مہزور علی کے مطابق ملزم کے دفتر پر چھاپہ مارا گیا، مگر دفتر بند پایا گیا۔ پولیس کا کہنا ہے کہ نہ تو واقعے کی کوئی شکایت درج کروائی گئی ہے اور نہ ہی متاثرہ فیملی کا سراغ ملا ہے، تاہم ملزم کو گرفتار کرنے کے لیے مختلف جگہوں پر چھاپے مارے جا رہے ہیں۔
سوشل میڈیا اطلاعات کے مطابق واقعہ سڑک پر تنازعے کی وجہ سے پیش آیا جبکہ اس دوران متاثرہ شخص کی بہن مسلسل ہاتھ جوڑ کر بھائی کو چھوڑنے کی درخواست کرتی رہی اور پورا خاندان شدید پریشان نظر آیا۔
حکام کا کہنا ہے کہ تفتیش جاری ہے اور واقعے کی مکمل تفصیلات اکٹھی کی جا رہی ہیں۔ پولیس نے شہریوں سے بھی اپیل کی ہے کہ اگر کوئی متاثرہ شخص یا عینی شاہد سامنے آنا چاہے تو وہ بلا جھجھک رابطہ کرے تاکہ انصاف کو یقینی بنایا جا سکے۔