یوٹیوب کی جانب سے ایک ایپ اپ ڈیٹ جاری کی ہے جس کے بعد متعدد پرانے آئی فون ڈیوائسز کے لیے گوگل کی ویڈیو شیئرنگ سروس کے لیے سپورٹ ختم ہو جائے گی۔
اس اپ ڈیٹ کے تحت یوٹیوب کے لیے آئی او ایس 16 یا اس کے بعد آپریٹنگ سسٹمز پر کام کرنے والے آئی فونز کے لیے ویڈیو شیئرنگ سروس کو سپورٹ فراہم کی جائے گی۔
اس نئی اپ ڈیٹ کے بعد آئی فون 6 ایس، 6 ایس پلس، آئی فون 7، 7 پلس اورآئی فون ایس ای (فرسٹ جنریشن) کے لیے یوٹیوب سپورٹ ختم ہو جائے گی۔
درحقیقت آئی او ایس 15 تک محدود ایپل کی ڈیوائسز میں اب یوٹیوب ایپ کو انسٹال یا اپ ڈیٹ کرنا ممکن ہی نہیں ہوگا۔
اگرچہ ان ڈیوائسز پر اب یوٹیوب ایپ کو چلانا ممکن نہیں ہوگا مگر اس سروس تک موبائل براؤزر کے ذریعے رسائی ممکن ہوگی۔
مگر موبائل براؤزر میں مختلف فیچرز جیسے آف لائن سپورٹ کو استعمال نہیں کیا جاسکے گا۔
یوٹیوب کی جانب سے پرانے آئی فونز کے لیے سپورٹ ختم کرنے کا فیصلہ اس وقت کیا گیا جب گزشتہ دنوں ایپل کی جانب سے آئی فون 6 کو متروک قرار دینے کا اعلان کیا گیا تھا۔
یوٹیوب سے قبل واٹس ایپ کی جانب سے بھی یکم جون سے پرانے آئی فونز کے لیے سپورٹ ختم کی گئی تھی۔
اب آئی او ایس 15.1 یا اس سے بعد کے آپریٹنگ سسٹمز پر کام کرنے والے آئی فونز پر ہی واٹس ایپ کو استعمال کرنا ممکن ہوگا۔
واٹس ایپ اور یوٹیوب کی جانب سے پرانے ماڈلز کے لیے سپورٹ ختم کرنے کا فیصلہ اس لیے کیا گیا کیونکہ کمپنیوں کے خیال میں نئے فیچرز کے لیے زیادہ بہتر ہارڈ وئیر کی ضرورت ہوتی ہے۔