چین نے امریکی صدر ڈونلڈ ٹرمپ پر ایران اور اسرائیل کشیدگی میں جلتی پر تیل ڈالنے اور جنگ کے شعلوں کو ہوا دینے کا الزام عائد کردیا۔
ترجمان چینی وزارت خارجہ نے اسرائیل ایران جنگ پر امریکی صدر کے تہران سے انخلا سے متعلق سوال کیا جس پر ترجمان چینی وزارت خارجہ گوجیا کون نے کہا کہ جلتی پر تیل ڈالنے اور شعلوں کو ہوا دینے سے کشیدگی کم کرنے میں کوئی مدد نہیں ملے گی بلکہ اس سے تنازع مزید پھیلے گا۔
ترجمان چینی وزارت خارجہ نے مزید کہا کہ دھمکیوں سے مشرق وسطیٰ میں امن قائم نہیں ہوسکتا۔ صورتحال کو پرسکون بنانے کے لیے سفارتی راستہ ہی واحد حل ہے، بیجنگ خطے میں کشیدگی کم کرنے کے لیے ثالثی کا کردار ادا کرنے پر آمادہ ہے۔
واضح رہے کہ چینی وزارت خارجہ کے ترجمان کی جانب سے مذکورہ بیان امریکی صدر کی ایرانی شہریوں کو تہران خالی کرنے کی دھمکی کے بعد سامنے آیا ہے۔ امریکی صدر نے گزشتہ روز سوشل میڈیا پر پوسٹ شیئر کرتے ہوئے خبردار کیا تھا کہ ایرانی شہری فوری طور پر تہران سے انخلاء کریں۔