فون چارج کرتے وقت ایک چھوٹی سی عادت آپ کے موبائل اور چارجر کی حفاظت کے لیے بہت اہم ثابت ہو سکتی ہے، اور وہ یہ ہے کہ چارج مکمل ہونے کے بعد سب سے پہلے چارجر کو پاور ساکٹ سے نکالیں، اس کے بعد موبائل کو کیبل سے الگ کریں۔ بظاہر معمولی لگنے والی یہ ترتیب آپ کے آلے کی حفاظت اور لمبی عمر کے لیے فائدہ مند ہو سکتی ہے۔
ایک معروف ٹیک ماہر کے مطابق، سب سے پہلے وال ساکٹ سے چارجر نکالنا ایک بہتر عمل ہے کیونکہ اس سے نہ صرف ممکنہ برقی جھٹکوں سے بچاؤ ممکن ہوتا ہے بلکہ نم یا مرطوب ماحول میں چھوٹے الیکٹریکل نقصانات سے بھی بچا جا سکتا ہے۔ یہ عادت خاص طور پر اُس وقت اہم ہے جب آپ کے ہاتھ گیلے ہوں یا آپ کسی دھاتی سطح کے قریب ہوں۔
اگرچہ جدید موبائل اور چارجرز میں حفاظتی خصوصیات شامل ہوتی ہیں، لیکن اس ترتیب پر عمل کرنا اضافی تحفظ فراہم کرتا ہے۔ بعض اوقات جب آپ وال ساکٹ سے چارجر نکالتے ہیں تو چنگاری یا جھماکہ سا محسوس ہوتا ہے، یہ وہی لمحہ ہوتا ہے جسے بچانے کے لیے پہلے چارجر نکالنے کی تجویز دی جاتی ہے۔
بیٹری کی حفاظت بھی موبائل کی کارکردگی میں کلیدی کردار ادا کرتی ہے۔ بیٹری کو بار بار 0% تک ختم کرنا یا بار بار 100% تک چارج کرنا اس کی صحت کے لیے نقصان دہ ہو سکتا ہے۔ ماہرین کا کہنا ہے کہ بیٹری کو 20% سے 80% کے درمیان رکھنا بہترین ہے۔ اس حد میں رکھنا بیٹری کی عمر کو بڑھاتا ہے اور اسے زیادہ چارج یا ڈی چارج ہونے کے نقصانات سے بچاتا ہے۔
اصل یا تصدیق شدہ چارجرز کا استعمال بھی ضروری ہے۔ غیر معیاری یا جعلی چارجرز نہ صرف بیٹری کو نقصان پہنچاتے ہیں بلکہ بعض اوقات موبائل کو بھی نقصان پہنچا سکتے ہیں یا آگ لگنے جیسے خطرناک واقعات کا باعث بن سکتے ہیں۔
فون کو زیادہ دیر تک، خاص طور پر پوری رات، چارج پر لگا چھوڑنا بھی مناسب نہیں۔ اگرچہ جدید فون مکمل چارج ہونے کے بعد بجلی لینا بند کر دیتے ہیں، لیکن مسلسل چارجنگ سے اضافی حرارت پیدا ہوتی ہے جو وقت کے ساتھ بیٹری کو نقصان پہنچاتی ہے۔
بیٹری کے علاوہ، چارجر کی حفاظت بھی اتنی ہی اہم ہے۔ کیبل کو سختی سے موڑنا، لپیٹنا یا ٹیڑھا رکھنا اس کے اندرونی تاروں کو نقصان پہنچا سکتا ہے۔ اس کے علاوہ چارجر کو حرارت، نمی یا دھات سے دور رکھنا چاہیے تاکہ زنگ یا شارٹ سرکٹ جیسے مسائل نہ ہوں۔
اس چھوٹی سی روزمرہ احتیاط سے نہ صرف آپ کے موبائل کی کارکردگی بہتر رہتی ہے، بلکہ یہ خرچے سے بھی بچاتی ہے۔ لہٰذا اگلی بار جب آپ فون چارج کریں، تو یاد رکھیں: سب سے پہلے وال ساکٹ سے چارجر نکالیں، اور بیٹری کی حفاظت کو معمول بنائیں۔ یہی چھوٹے اقدامات آپ کے موبائل کو طویل عمر اور بہتر حفاظت فراہم کرتے ہیں۔