وفاقی وزیرِ داخلہ محسن نقوی نے نادرا سینٹر گوجرانوالہ کا دورہ کرتے ہوئے شہریوں کو فراہم کی جانے والی سہولیات اور خدمات کے معیار کا جائزہ لیا۔ دورے کے دوران انہوں نے مختلف کاؤنٹرز پر جاکر عملے سے گفتگو کی اور دستاویزات کے اجراء کے نظام کو مزید مؤثر بنانے کی ہدایات دیں۔
وزیرِ داخلہ نے سینٹر میں موجود شہریوں سے براہ راست مسائل دریافت کیے۔ شہریوں نے مجموعی کارکردگی پر اطمینان کا اظہار کرتے ہوئے بتایا کہ اب انہیں پہلے کی نسبت کم انتظار کرنا پڑتا ہے۔ محسن نقوی نے رش والے علاقوں کا تفصیلی معائنہ کیا اور ہدایت کی کہ شہریوں کو کسی قسم کی تاخیر یا رکاوٹ کا سامنا نہ کرنا پڑے۔
انہوں نے واضح کیا کہ نادرا سینٹر آنے والا ہر شہری وی آئی پی ہے۔ اس کے کام کو ترجیحی بنیادوں پر مکمل کیا جائے اور دستاویزات مقررہ وقت پر مہیا کی جائیں۔
محسن نقوی نے عملے کی محنت اور سرگرم کارکردگی کو سراہتے ہوئے کہا کہ سہولیات کی مزید بہتری حکومت کی اولین ترجیح ہے۔ انہوں نے نادرا انچارج کو موقع پر ہی شہریوں کے مسائل کے فوری حل کے احکامات جاری کیے۔