تاریخ میں پہلی بار پاکستان ٹیسٹ رینکنگ میں ٹاپ پوزیشن پر

کسی نے کیا خوب کہا ہے کہ “ محنت کرنے والوں کی کبھی ہار نہیں ہوتی“- محنت٬ قابلیت اور سچی لگن کے بل بوتے پر یہ ٹیم فرش سے عرش پر جاپہنچی- گزشتہ کلی سالوں سے ہم پاکستان کرکٹ ٹیم کے اتار چڑھاؤ کو دیکھتے آرہے ہیں- ہم نے اس ٹیم کو بری طرح ہارتے بھی دیکھا ہے اور خوب محنت کر کے جیتتے ہوئے بھی-

ٹیسٹ میچوں میں پاکستان کرکٹ ٹیم کی کارکردگی کسی سے ڈھکی چھپی نہیں- یہی وجہ ہے کہ ٹیسٹ ٹیم رینکنگ میں پہلی پوزیشن پر آنا محض ایک خواب تھا جو اب حقیقت میں تبدیل ہوچکا ہے-

قسمت کی دیوی پاکستان ٹیم پر خوب مہربان ہوئی- اور مزے کی بات یہ ہے کہ اس عالمی درجہ بندی میں بھارت کا بڑا کلیدی کردار ہے- گزشتہ روز سابق عالمی نمبر ون ٹیم بھارت اور ویسٹ انڈیز کے درمیان چوتھا ٹیسٹ میچ کھیلا گیا- میچ کے چوتھے دن خراب موسم کے باعث کوئی گیند نہ پھینکی جاسکی- میچ کے پہلے روز صرف 22 اوور کھیلے گئے جس میں میزبان ٹیم نے 2 وکٹ کے نقصان پر 62 رنز بنائے-

اس صورتحال میں یہ میچ ڈرا ہوگیا- بےنتیجہ میچ کے باعث ٹیسٹ رینکنگ میں دوسرے نمبر پر موجود پاکستان بھارت سے ٹاپ پوزیشن چھیننے میں کامیاب ہوگیا- بھارت کو اپنی پہلی پوزیشن برقرار رکھنے کے لیے سیریز میں کم سے کم 0-3 سے برتری درکار تھی- لیکن چوتھا ٹیسٹ ڈرا ہونے کی صورت میں وہ اپنا اعزاز برقرار نہ رکھ سکی-

اور یوں پاکستان ٹیم مصباح الحق کی قیادت میں ٹیسٹ کرکٹ کی تاریخ میں پہلی بار ٹاپ پوزیشن پر آگئی جو کہ بلاشبہ پاکستان کرکٹ کی ایک بڑی کامیابی ہے-

ہماری دعا ہے کہ پاکستان ٹیم اسی طرح کامیابی کی سیڑھیاں چڑھتی رہے- آمین

< Previous پاکستانی کرکٹر مشہور ہونے سے قبل کیا تھے؟NEXT > ویٹ لفٹنگ کا ریکارڈ ساز پاکستانی کھلاڑی