کنجوسی کی ناقابلِ یقین داستان رقم کرنے والے 7 ارب پتی

شطرنج کے مشہور کھلاڑی چارلس اے جیف نے ایک مرتبہ کہا تھا کہ “ آپ کبھی بھی اپنے ذریعہ روزگار سے امیر نہیں بنتے ہیں بلکہ آپ اپنی خرچ کرنے والی عادات سے امیر بنتے ہیں“- بلاجھجک اس بات کا دعویٰ کیا جاسکتا ہے دنیا میں کئی ایسے انتہائی امیر ترین انسان موجود ہیں جو اپنی عیاشیوں اور فضول خرچیوں کی وجہ سے دنیا بھر میں شہرت رکھتے ہیں- لیکن اس کے برعکس دنیا میں کئی چند ایسے ارب پتی افراد بھی پائے جاتے ہیں جو انتہائی کفایت شعاری کے سادہ طرزِ زندگی اپنائے ہوئے ہیں جبکہ ان کا شمار دنیا کے امیر ترین انسانوں میں ہوتا ہے- یہ ارب پتی اس حد تک کم خرچ پر مشتمل زندگی گزارتے ہیں کہ اپنی انہی عادات کی وجہ سے دنیا کے بخیل ترین ارب پتی سمجھے جاتے ہیں-
 

بل گیٹس - 10 ڈالر کی گھڑی
بل گیٹس کے نام سے کون واقف نہیں- یہ اس وقت دنیا کے دوسرے سب سے امیر ترین انسان ہیں- ان کے اثاثوں کی مالیت 93 ارب ڈالر سے زائد ہے- لیکن آپ کو یہ جان کر حیرت ہوگی کہ اتنی دولت ہونے کے باوجود انہوں نے جو گھڑی پہن رکھی ہوتی ہے اس کی مالیت صرف 10 ڈالر ہے- یہی نہیں بلکہ بل گیٹس اپنے گھر کے برتن بھی خود اپنے ہاتھوں سے دھوتے ہیں کیونکہ ڈش واشر استعمال کرنے سے بجلی کا ضیاع ہوتا ہے-

مارک زکر برگ - 30 ہزار ڈالر کی گاڑی
فیس بک کے بانی مارک زکر برگ بھی دنیا کے امیر ترین انسانوں میں سے ایک ہیں- اس وقت بھی مارک زکر برگ کے اثاثوں کی مالیت 73 ارب ڈالر سے زائد ہے- لیکن ان کا ہیڈ افس تک انتہائی سادہ ہے- اگر بات کی جائے ان کی ذاتی زندگی کی تو انہوں نے چند سال قبل ایک چینی خاتون سے شادی کی اور وہ بھی انتہائی سادگی کے ساتھ- مارک زکر برگ کے زیرِ استعمال گاڑی بھی انتہائی عام سی ہے جس کی مالیت 30 ہزار ڈالر تک ہے- مارک زکر برگ نے سال 2011 میں 7 ملین ڈالر کا گھر تو خریدا لیکن ان کے اثاثوں کے مقابلے میں یہ گھر بھی انتہائی سادہ تھا-

وارن بفٹ - 31500 ڈالر کا پرانا گھر
وارن بفٹ 84 ارب ڈالر کے ساتھ دنیا کے امیر ترین انسان ہیں- اتنے امیر ترین انسان ہونے کے باوجود وارن اب بھی ایک پرانے گھر میں رہائش پذیر ہیں جو کہ 1958 میں 31500 ڈالر کا خریدا گیا تھا- یہ صرف 5 کمروں کا حامل گھر ہے- Berkshire Hathaway کے چیف ایگزیکٹو وارن بفٹ اس گھر کو اپنی زندگی کی تیسری بڑی سرمایہ کاری قرار دیتے ہیں- وارن ایک انتہائی سادہ طبعیت کے مالک سمجھے جاتے ہیں-

چارلی ایریگن - سادہ پیپر بیگ میں لنچ
یہ ڈش نیٹ ورک کے بانی اور مالک ہیں اور ان کے اثاثوں کی مالیت 13 ارب ڈالر سے زائد ہے- چارلی جو بڑے بڑے کیسینو اور ہوٹل خریدنے کی طاقت رکھتے ہیں وہ اب تک گھر سے ایک سادہ پیپر بیگ میں کھانا ساتھ لے کر آتے ہیں- وہ اسی کھانے کو گرم کر کے کھاتے ہیں اور اس لنچ باکس میں ایک مشروب اور ایک عدد سینڈوچ ہوتا ہے- اتنی دولت ہونے کے باوجود چارلی اور ان کی اہلیہ گزشتہ 20 سالوں سے ایک سادہ سے گھر میں مقیم ہیں-

جان کوڈویل - بال خود کاٹتے ہیں
یہ موبائل فون ریٹیلر فون فور ون کے مالک ہیں اور ایک امریکن ارب پتی شخص ہیں- ان کے پاس 13 ارب ڈالر سے زائد کے اثاثے موجود ہیں- لیکن یہ انتہائی سادہ طرزِ زندگی گزاتے ہیں٬ یہاں تک کہ یہ اپنے بال بھی خود کاٹتے ہیں-

امینزیو اورٹیگا - ملازمین کے ساتھ لنچ
یہ دنیا کے چھٹے اور یورپ کے دوسرے امیر ترین انسان ہونے کے باوجود نہایت سادہ زندگی بسر کرتے ہیں- یہ زارا کلاتھنگ کے مالک ہیں- یہ انتہائی سادہ سے اپارٹمنٹ میں رہائش اختیار کیے ہوئے اور روزانہ کیفے ٹیریا میں بیٹھ کر اپنے ملازمین کے ساتھ ہی لنچ کرتے ہیں-