ٹریفک جام کی صورت میں کتنا اضافی پیٹرول خرچ ہوتا ہے؟

کراچی میں ٹریفک جام کا مسئلہ آئے روز کا معمول بن چکا ہے- یہ مسئلہ نہ صرف اذیت اور وقت کے ضیاع کا باعث بن رہا ہے بلکہ جیب پر بھی بھاری پڑ رہا ہے- حال ہی میں ایک چونکا دینے والا انکشاف ہوا ہے کہ ٹریفک جام کی وجہ سے کراچی کی عوام کو اضافی پیٹرول ڈلوانا پڑ رہا ہے جس کی مجموعی قیمت یومیہ کروڑوں روپے بنتی ہے-
 

رواں ماہ کے پہلے ہفتے کے روز عوام نے ایک روز میں تقریباً 5 کروڑ روپے کا اضافی پیٹرول ڈلوایا۔ اس اضافی پیٹرول کی وجہ ایم اے جناح روڈ پر تعمیراتی کام تھا جو کہ اب بھی جاری ہے- اور اس کے باعث کراچی میں ٹریفک جام معمول بن چکا ہے-

چیئرمین آئل ٹینکرز ایسو سی ایشن کے مطابق ہفتے کو شہریوں نے 5 لاکھ لیٹر اضافی پیٹرول ڈلوایا، جس پر تقریباً 5 کروڑ روپے اضافی خرچ ہوئے، کراچی میں روزانہ تقریباً 22 لاکھ لیٹر پیڑول استعمال ہوتا ہے۔

ایم اے جناح روڈ پر انڈر پاس کی تعمیر کے باعث روڈ کی بندش سے اطراف کی سڑکوں پر شدید ٹریفک جام معمول بن گیا ہے، جس کے باعث متبادل راستوں پر گاڑیوں کی لمبی لمبی قطاریں لگ جاتی ہیں۔

صبح سویرے دفاتر جانے والے اور شام میں واپس گھروں کو جانے والوں کو شدید پریشانی کا سامنا کرنا پڑتا ہے، وقت کے ضیاع کے ساتھ ساتھ اخراجات میں بھی اضافہ ہورہا ہے۔
 

ٹریفک جام کے مسائل کا سامنا صرف کراچی کو ہی نہیں بلکہ پاکستان کے دیگر بڑے شہروں کو بھی ہے جس کے باعث وہاں کے شہریوں کو بھی اضافی پیٹرول خرچ کرنا پڑتا ہے اور یوں یومیہ کروڑوں روپے کا اضافی پیٹرول خرچ کیا جارہا ہے جس کا بوجھ صرف عوام کی جیب پر ہے-