پچھلے دنوں سلیم صافی نے اپنے
پروگرام جرگہ میں منورحسن صاحب کا انٹرویو کیا۔ اس انٹرویو میں محترم نے جس
قدر متضاد گفتگو کی اور کئی جگہ پر محض قیاس سے کام لیتے ہوئے تبصرے کئے ان
کی امیر جماعت سے کم از کم امید نہیں تھی۔
حیران کن بات یہ ہے کہ موصوف نے کسی بھی مرحلے پر پاکستان میں جاری خودکش
حملوں کی مذمّت نہیں کی اور اس معاملے سے پہلو بچاتے رہے۔ اس سے آپ اندازہ
کر سکتے ہیں کہ اگر جماعت اسلامی جیسی معتدل جماعت کی یہ سوچ ہو تو انتہا
پسند جماعتیں کیا سوچ رکھتی ہوں گی۔
منوّر حسن صاحب نے حیران کن انکشاف بھی کیا کہ جماعت اسلامی افغانستان میں
امریکہ کے خلاف جہاد نہیں کر رہی ہے کیوں کہ افغانیوں نے کسی سے مدد طلب
نہیں کی اور جہاد کا فتویٰ بھی نہیں دیا۔
اس کے علاوہ محترم امیرِجماعت نے دراندازی کے امریکی اور ہندوستانی الزامات
کی تصدیق بھی کی جو کہ پاکستانی سرکاری 40 سالہ موٴقف کے بالکل متضاد ہے۔
یہ ایک طویل انٹرویو تھا جو کہ میں لفظ بہ لفظ نقل نہیں کر سکتا تھا لہٰذا
YouTube.com part 1 https://www.youtube.com/watch?v=4eJbtx7DmYI
PK politics – Full interview https://pkpolitics.com/2011/06/09/jirga-9-june-2011/
کا لنک حاضرہے۔ براہِ کرم پورا انٹرویو سنئے کیوں کہ کبھی کبھار ایک لفظ
بدلنے سے بات کا مکمل مفہوم بدل جاتا ہے۔ جبکہ میں نے تو بہت اختصار سے کام
لیا ہے۔ مگر پوری کوشش کی ہے کہ بات کو توڑا یا مروڑا نہ جائے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
امریکہ کے خلاف جہاد سے پہلو تہی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جواب۔ افغانیوں نے روس کے خلاف جہاد خود شروع کیا اور پھر پاکستان اور
پاکستان سے باہر دنیا بھر میں جہاد کی اپیل کی۔ مگر امریکہ سے جہاد کے لئے
تو انہوں نے کسی سے اپیل نہیں کی۔
سوال۔ ملاّ عمر اور گلبدین حکمت یار اب بھی اسی رستے پر گامزن ہیں۔ وہ آج
بھی دنیا سے اپیل کر رہے ہیں؟
جواب ۔ یہ تو آپ کو بھی پتہ ہے کہ ان دونوں میں کتنا تعاون موجود ہے اور
کتنا عدم تعاون موجود ہے۔ اور کتنا اعتماد ہے اور کتنا اعتماد موجود نہیں
ہے۔ جب یہ دونوں وہاں بیٹھ کر مختلف راہوں پر چل رہے ہیں تو پھر بدرجیٰ
اولیٰ تو باہر سے ان کی اپیل تو کسی سے بھی نہیں ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ایک اور تضاد
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سوال۔ امریکہ کے قبرستان بنانے میں آپ کا کیا حصہ ہے؟ روس کے معاملے میں تو
آپ کا حصہ تھا۔
جواب۔ چلیئے ایک کا تو آپ نے مان لیا۔ دوسرے کا بھی کچھ عرصے بعد مان لیں
گے۔
﴿اس سے پہلے اور بعد میں فتویٰ کے نہ ہونے اور نہ لڑنے کا اعتراف کر چکے
ہیں﴾
سوال۔ مجھے تو اس پر بھی اعتراض ہے کہ اگر وہ پاکستان کی جنگ تھی تو فوج کو
لڑنی چاہئے تھی۔ آپ نے دوسروں کے بچوں کو کیوں بھیج دیا؟
جواب۔ وہ کسی کے بچے نہیں تھے۔ وہ مجاہد تھے۔ کوئی کسی کو زبردستی نہیں
بھیج سکتا۔ اب بھی اگر افغانستان میں مجاہد پاکستان سے اپیل کریں اور فتویٰ
دیں تو میں سمجھتا ہوں کہ منظر نامہ بدل جائے گا۔
سوال۔ کیا ہمارا حق بنتا ہے کہ ہم وہاں مداخلت کریں؟
جواب۔ پہلے وہ فتویٰ دیں پھر ہم بات کریں گے۔ ابھی تو ہم نہیں کر رہے نا۔
حق بنتا ہے یا نہیں بنتا تو بعد کی بات ہے۔ لیکن یہ ضرور ہے کہ ہم نے
امریکہ کے خلاف چارج شیٹ مہیا کی ہے۔ ذہنوں کی آبیاری کی ہے۔ کچھ کرنے کا
داعیہ پیدا کیا ہے۔ اور دامے درمے سخنے ایک کلچر فراہم کیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سخت سوال
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سوال۔ جماعت اسلامی نے 1979 سے لیکر 1990 تک امریکہ کے خلاف کوئی قابل ذکر
تحریک نہیں چلائی۔
جواب نہیں دیا گیا۔
سوال۔ لوگ پوچھتے ہیں کہ افغان گروپس نے جو کچھ کیا، ملا عمر اور گلبدین نے
جو کچھ ایک دوسرے کے ساتھ کیا تو کیا امریکہ سے زیادہ ہم اپنے دشمن خود
نہیں ہیں؟
جواب۔ اسلامی ملکوں میں جو 56 حکمران ہیں، بادشاہ ہیں سب سے بڑے دشمن تو وہ
خود ہی ہیں۔ اور ان کی وجہ سے کوئی اسلامی فوج مسلمانوں کی پشتیبان نہیں۔
سوال۔ اگر امریکہ کل افغانستان سے چلا جائے تو کیا افغان ایک دوسرے سے لڑنے
نہیں لگیں گے۔
جواب۔ امریکہ دنیا میں امن کا ٹھیکیدار نہیں ہے۔ افغان اگر لڑیں گے تو خود
ہی صلح کریں گے۔ امریکہ کو یہاں آنے کا حق نہیں تھا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جوابات میں تضاد
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سوال۔ کیا آپ نہیں سمجھتے کہ روس کو پچھاڑ کر آپ نے یاسر عرفات کو امریکہ
کے قدموں میں بٹھا دیا؟
جواب۔ اگر آپ کی بات کو تسلیم کیا جائے تو یہ بات کو بہت اوور سمپلیفائی
کرنے کے مترادف ہوگا۔ روس بنیادی طور پر مذہب دشمن ملک تھا۔ مسلمان بنیادی
طور پر بے نمازی ہوسکتا ہے مگر نماز کو گالی برداشت نہیں کر سکتا۔ اس ہی
لئے روس کے انہدام پر ان تمام قوتوں کو مسرّت ہوئی۔ اور ان تمام قوتوں کا
حصّہ بھی تھا۔
لیاقت علی خان کے امریکی دورے کے موقعے پر مولانا مودودی نے اس کی مخالفت
کی تھی اور کہا تھا کہ قریب کے پڑوسیوں کو ناراض کر کے دور کے لوگوں سے
دوستی کرنا یہ پاکستان کو مہنگی پڑے گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جوابات میں تضاد
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آ ئی جی فرنٹئر کور کے مطابق بھارت افغانستان کے راستے پختونخواہ اور
بلوچستان کے راستے پاکستان کو ڈی اسٹیبلائز کر رہا ہے، پیسے اور خودکش
بمبار بھیج رہا ہے۔
سوال۔ کیا امریکن یا انڈین جو آخرت پر یقین نہیں رکھتے کیا خودکش دھماکے کر
سکتے ہیں؟ِ
جواب۔ دیکھیں سب کچھ ہو سکتا ہے۔ آپ انتقام کی آگ بھڑکائیں تو سب ہو سکتا
ہے۔ ہر چیز ممکن العمل ہے اور سہل الحصول ہے۔ جب حکومتیں پیسے لے کر کام
کرتی ہیں تو افراد اور گروہوں پر سوالیہ نشان کیوں؟
سوال۔ حکیم ﷲ، بیتﷲ وغیرہ دھماکے کی ذمہ داری قبول کرتے ہیں تو وہ کیا
امریکی ایجنٹ ہیں؟
جواب۔ آپ نے جب بات نکالی ہے تو سنیں۔ مولانا صوفی محمد ہیں۔ ہمارے معاشرے
میں تمام نیشنلسٹوں، سندھی بلوچی جو آئین کو نہیں مانتے مگر صوفی محمد نہ
مانے تو قابل گردن زدنی ہے۔ جب آپ ایسے معیار مقرر کریں گے تو ایسی سیاست
شروع ہو جائے گی۔ لوگوں میں اشتعال ہوتا ہے تو ردعمل ہوتا ہے۔
سوال۔ اگر ردّعمل ہوتا ہے تو پھر تو وہ اپنے لوگ ہوتے ہیں۔ آپ بلیک واٹر یا
زی یا انڈیا کو کیوں بیچ میں لاتے ہیں؟
جواب۔ گڑبڑا گئے۔ آپ کی بات سے رحمٰن ملک یاد آگئے جو ہمارے ملک میں بلیک
واٹر کے سب سے بڑے وکیل صفائی ہیں۔ ہر معاملے کے اندر طالبان کے خلاف چارج
شیٹ پیش کر دیتے ہیں۔ امریکی سیکریٹری دفاع نے یہ بات کہی ہے کہ ہم نے بلیک
واٹر کے ذریعے عراق میں بھی بہت کام کیا تھا اور اب پاکستان میں بھی بلیک
واٹر ہماری بڑی مددگارثابت ہوئی ہے۔
سوال۔ اگر یہ بلیک واٹر یا انڈین ہیں تو خاکم بدہن ان کا پہلا نشانہ تو آپ
لوگ ہونے چاہئے تھے جو امریکہ اور انڈیا کے مخالف ہیں۔ وہ اسفند یار ولی،
آفتاب شیر پاوٴ، رحمٰن ملک، اور بےنظیر بھٹو کو نشانہ کیوں بناتے ہیں؟
﴿ہنستے ہوئے﴾ پھر اس سے یہ نتیجہ نہیں نکلتا کہ اندر سے آپ بھی امریکہ کے
دوست ہیں؟
جواب۔ ﴿ہنستے ہوئے﴾ ذرا آہستہ کہئے کہیں کوئی سن ہی نہ لے اس بات کو۔ اس
وقت جو حالات ہیں ان میں اس طرح کے دلائل سے معاملات کو تبدیل نہیں کیا
جاسکتا۔ دشمنی کسی کی اچھی نہیں مگر امریکہ کی تو دوستی بھی اچھی نہیں۔ پھر
بہر حال اس کے نتائج ہوتے ہیں۔ لیکن ان حالات میں لوگوں کو اپنی دشمنیاں
نکالنے کا موقع بھی مل جاتا ہے۔ اے این پی ایک سیاسی پارٹی رہی ہے مگر جس
طرح وہ اس وقت پٹھانوں کو بیچ رہے ہیں۔ کوئی سوچ بھی نہیں سکتا تھا کہ وہ
پختونوں کی اسقدر دشمن ہو سکتی ہے۔ حالانکہ جب افغان روس سے لڑ رہے تھے تو
یہ روس کی گود میں بیٹھے تھے۔ ﴿ یہاں منوّر صاحب جواب دینے کے بجائے اے این
پی پہ بات گھما دی﴾
۔۔۔۔۔۔۔۔۔۔۔۔۔۔۔۔۔۔
پھر تضاد
۔۔۔۔۔۔۔۔۔۔۔۔۔۔۔۔۔۔
سوال۔ اے این پی تو کہتی ہے کہ ہم امریکہ اور روس کی لڑائی کی آگ کو اپنے
ملک میں لے آئے۔ اگر افغانستان پر روس نے حملہ کیا تھا تو ہم نے اس میں
مداخلت کیوں کی اور ایک فریق کیوں بنے؟
جواب۔ افغانستان کا تو پورا بارڈر ہی پورس ہے۔ ہر وقت مداخلت، اگر لفظ
مداخلت درست ہے، ہوتی ہے۔ قائد اعظم نے تو وہاں فوج لگانے کو ہی منع کر دیا
تھا۔ دونوں طرف ایک ہی قبائل موجود ہیں۔ رشتہ دار رہتے ہیں۔ ہر وقت آتے
جاتے رہتے ہیں۔ آج تک امریکن اس بارڈر کو بند نہیں کر پائے۔ اس لئے
افغانستان اور پاکستان علیحدہ ہونے کے باوجود ایک ہو کر کام کرتے رہے ہیں۔
دونوں کے غم اور خوشیاں ایک رہے ہیں۔ ﴿محترم پاکستان اور افغانستان کے
دہائیوں پر محیط تلخ تعلقات کو شاید بھول گئیے۔ حتی کہ افغانستان واحد ملک
تھا جس نے پاکستان کی اقوامِ متحدہ کی رکنیت کی مخالفت کی تھی﴾
سوال۔ تو اس کا مطلب یہ ہے کہ باقی دنیا پھر قبائیلی علاقوں تک آسکتی ہے
کیوں کہ یہ تو پھر ایک ہی علاقے ہیں؟
جواب۔ یہ انالوجی درست نہیں ہے۔ امریکہ کو تو امریکہ سے نکلنے کیلئے
پاسپورٹ کی ضرورت ہے اور مظالم کے لئے تو پاسپورٹ بھی کافی نہیں ہے۔ آپ نے
روس سے جہاد کے دوران نعرے سنے ہوں گے۔ سوشلزم کا قبرستان، افغانستان،
افغانستان۔ اور اب میں کہے بغیر نہیں رہ سکتا کہ امریکہ کی دانش کا قبرستان
افغانستان بن کر رہ گیا ہے۔ اگر آزاد میڈیا ہو تا تو اب تک امریکہ کی شکست
کی خبر نشر ہو چکی ہوتی۔ ﴿بات کی تردید اور پھر بات دوبارہ گھما دی﴾
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
انڈیا اور امریکہ کے موقف کی تائید
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سوال۔ آپ نے لوگوں کا ذہن بنایا اور انہیں مسئلے کا حل جہاد میں بتایا۔ اب
آپ تو سیاست کر رہے ہیں۔ وہ چونکہ کر نہیں سکتے، کشمیر جا نہیں سکتے لہٰذا
وہ ملک میں تشدد کا راستہ اپنا رہے ہیں؟
جواب۔ دیکھیں جو کشمیر جاسکتے ہیں وہ کشمیر جا رہے ہیں۔ جو افغانستان جا
سکتے ہیں وہ جارہے ہیں۔ ہم یہ سمجھتے ہیں کہ جس خطے میں آزادیاں ہوں ، حقوق
میسر ہوں اور اسلام کی دعوت کو کھلے بندوں پیش کیا جاسکتا ہو، لوگوں کے
ذہنوں کو تبدیل کر کے انقلاب لایا جاسکتا ہو، وہاں یہ راستہ اختیار کرنا
چاہئے حتیٰ کہ یہ راستہ نہ بچے۔
سوال۔ یہ موقعہ تو کشمیر میں بھی ہے اور افغانستان میں بھی؟
جواب۔ وہاں بھی یہ ہورہا ہے۔ وہاں حزب المجاہدیں بھی کام کر رہی ہے اور
جماعت اسلامی بھی۔ جماعت تبلیغ کا کام کرتی ہے اور حزب اپنے دائرے میں کام
کرتی ہے۔
سوال۔ میجر مست گل نے جب انڈیا میں کاروائی کی تو جماعت اسلامی نے اسے ہیرو
کے طور پر ملک بھر میں گھمایا اور اس نے اس کارروائی کا اقرار بھی کیا۔ اس
سے انڈیا کے موٴقف کو تقویت ملی۔
جواب نہیں دیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خود کش حملوں کی مذمّت سے انکار
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سوال۔ تو پھر جو لوگ پاکستان میں مرنے مارنےپر تل گئے ہیں انہیں آپ کو رد
کیوں نہیں کرتے؟ آپ انہیں خلاف شریعت کیوں نہیں کہتے؟
جواب۔ میں کہتا ہوں کہ دہشت گردی کے خلاف جنگ کو ختم کر دیں پھر ہم اسے رد
کریں گے۔ دہشت گردی کے خلاف جنگ سے ہم باہر آجائیں، ملٹری آپریشن بند کر
دیا جائے، جرگے کی سیاست کی جائے، مذاکرات کی میز بچھائی جائے، اس کے
باوجود جب مارنا مرنا ہوگا جیسے پہلے مسجدوں، امام بارگاہوں میں حملے ہوں
گے تو ہم انہیں رد کریں گے۔
سوال۔ کیا آپ یہ ضمانت دے سکتے ہیں کہ اگر آپ کی بات مان لیں تو یہ حملے
اور افغانستان میں مداخلت نہیں ہوگی؟
جواب۔ یہ سب پہلےنہیں ہورہا تھا۔ دہشتگردی کی جنگ کے بعد یہ سب پھیلا ہے۔
سوال۔ جناب مولانا صوفی نے تو 1990 میں ہتھیار اٹھا لئے تھے۔
جواب۔ دیکھیں میں پہلے کہہ چکا ہوں کہ صوفی محمد تو بڑا مظلوم آدمی ہے کہ
اگر وہ آئینِ پاکستان کے خلاف بات کرے تو اسے جیل بھیج دیتے ہیں۔ اور سارے
نیشنلسٹ کو مذاکرات کی میز پر جمع کر لیتے ہیں۔ تو صوفی محمد کے ساتھ خصوصی
سلوک کیوں ہوتا ہے؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عرب حکمرانوں پر تنقید سے گریز۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سوال۔ امریکی غلامی کے معاملے میں عرب حکمران ہم سے زیادہ غلام ہیں۔ ہم تو
اقتصادی مجبوری میں ایسا کرتے ہیں۔ مگر وہ تو دولت مند ہیں۔ ہم نے آپ لوگوں
کو ان پر تنقید کرتے نہیں سنا جبکہ پاکستانی حکومت پر بہت تنقید کرتے ہیں؟
جواب۔ اپنی حکومت مجبوری میں نہیں کر رہی ہے۔ بے تحاشا کرپشن ہے۔ سپریم
کورٹ کے فیصلوں پر عمل نہیں ہوتا۔ ایسی حکومت پر ترس نہیں کھایا جا سکتا۔
عرب حکمرانوں پر جن کا حق بنتا ہے، فرض بنتا ہے بات کرتے ہیں۔ ہمارا بھی جب
موقع ہوتا ہے بات کرتے ہیں۔ ہم چھوڑتے نہیں بلکہ جب جبر کی حکمرانی پیر
تسمہ پا بنتی ہے تو ہم اس پہ بات کرتے ہیں۔
سوال۔ کیا آپ کے خیال میں افغانستان کے معاملے میں عرب حکمران اتنے ہی مجرم
ہیں جتنے ہمارے؟
سوال۔ نہیں ہماری حکومت زیادہ مجرم ہے۔ کیونکہ یہ اپنے آپ کو جمہوری کہتی
ہے۔ یہ عوام کے ووٹوں سے منتخب ہو کر آئی ہے۔ جو حکومت اپنے مینڈیٹ کو پورا
نہ کرے وہ زیادہ گردن زدنی ہے۔ |