جمعہ کے دن کا نام بریانی ہوتا، اگر ہفتے کے دنوں کے نام کھانے کی مختلف ڈشز پر ہوتے تو کیا ہوتے؟

ہفتے کے سات دن ہوتے ہیں اور ہر دن ایک علیحدہ مزاج اور موڈ کا حامل ہوتا ہے جس طرح اگر انسان کے اندر کا موسم اچھا ہو تو اس کو باہر کے موسم خود بخود اچھے لگنے لگتے ہیں- اسی طرح سے ہر دن کی فیلنگ بھی مختلف ہوتی ہیں- سوچا کہ اگر ہفتے کے دنوں کے نام موڈ کے حساب سے کسی کھانے کے نام پر ہوتے تو کیا ہوتے۔ یہ آرٹیکل اکثریتی افراد کی رائے کو سامنے رکھ کر تحریر کیا گیا ہے اگر اس حوالے سےآپ کی رائے مختلف ہو تو آپ کمنٹ سیکشن میں اپنی رائے بتا سکتے ہیں-

پیر کا دن

کام کرنے والے افراد کے لیے پیر کا دن ہفتے کا پہلا دن ہوتا ہے۔ دو دن کی چھٹی کے اور آرام کے بعد کام پر جانا ہر فرد کو سخت نا پسند ہوتا ہے۔ جب اس حوالے سے لوگوں سے سوال پوچھا گیا تو ان کا کہنا تھا کہ پیر کا دن کڑوے کریلے جیسا ہوتا ہے جبکہ کچھ افراد نے اس دن کو بینگن سے بھی تعبیر کیا جس کی پکی ہوئی سبزی کم ہی لوگوں کو پسند ہوتی ہے-

منگل کا دن

ہفتے کا دوسرا دن جب کہ انسان کافی حد تک اپنے شیڈول کا عادی ہو جاتا ہے تو اس دن کو زيادہ تر افراد کڑھی کی طرح لیتے ہیں ویسے بھی منگل کا دن وہ دن ہوتا ہے جب کہ گوشت کا ناغہ ہوتا ہے اس وجہ سے زيادہ تر افراد منگل کے دن کو کڑھی کے دن سے بھی تشبیہ دیتے ہیں-

بدھ کا دن

بدھ کا دن ہفتے کا تیسرا دن جب کہ لوگ بالکل درمیان میں ہوتے ہیں کام کرتے ہوئے دو دن گزر چکے ہوتے ہیں اور دو دن کے بعد ہفتہ اتوار کی چھٹی کی امید بھی پیدا ہو رہی ہوتی ہے تو اس دن انسان کافی حد تک خود کو ہلکا پھلکا محسوس کر رہا ہوتا ہے اور اس کو یہ امید ہوتی ہے کہ دو دن کے بعد چھٹی آنے والی ہے- اس دن کا خیال آتے ہی گرم گرم دال چاول کی پلیٹ کا خیال آجاتا ہے جس کی خوشبو سب کو اپنی طرف متوجہ کر لیتی ہے-

جمعرات کا دن

جمعرات کا دن جس کو بھری مراد کا دن بھی کہا جاتا ہے یہ دن زیادہ تر افراد کو بہت بابرکت محسوس ہوتا ہے اور اسی برکت کے حساب سے جب لوگوں سے دریافت کیا گیا کہ جمعرات کا دن کس کھانے کی طرح محسوس ہوتا ہے تو اسی فی صد لوگوں کا جواب تھا کہ یہ دن آلو گوشت کی طرح ہوتا ہے- جس طرح آلو گوشت کو پاکستان کا عوامی سالن کہا جاتا ہے اسی طرح جمعرات بھی ایک عوامی دن ہوتا ہے کیوں کہ یہ ہفتے کا چوتھا دن ہوتا ہے اور چھٹیوں کے دن کے قریب قریب ہوتا ہے-

جمعہ کا دن

جمعہ کے دن کا خیال آتے ہی بریانی کا خیال ہر ایک کے ذہن و دل میں ہوتا ہے مذہبی طور پر بھی اس دن کی بہت اہمیت ہے اور اس کو یوم عید سے بھی تعبیر کیا جاتا ہے اور جہاں عید کا دن ہو گا تو بریانی تو ہو گی ہی- جمعہ کے دن کے ساتھ ایک اور خوشی بھی جڑی ہوتی ہے جو کہ چھٹی کی آمد کی خوشی ہوتی ہے اس وجہ سے اس دن کو سیلیبریٹ کرنے کے لیے بریانی بہترین ہوتی ہے-

ہفتے کا دن

چھٹی کا یہ پہلا دن سست اور پولا پولا سا ہوتا ہے جس میں پورے ہفتے کی تھکن آرام کے ذریعے اتارنے کی کوشش کی جاتی ہے- یہ دن ایسا ہوتا ہے جیسے کہ پاستا ہو یا نرم نرم اسپیگٹیز کی طرح ہوتا ہے-

اتوار کا دن

خوشی اور غم سے ملا ہوا یہ دن ایک جانب تو چھٹی کی وجہ سے خوشی دیتا ہے تو دوسری طرف اگلے دن پیر ہونے کے سبب چھٹی کے ختم ہونے کا دکھ بھی ہوتا ہے- یہ دن لوگوں کے مطابق پیزا کی طرح ہوتا ہے جس کو ہر کوئی بہت پسند کرتا ہے مگر وہ پلک چھپکتے ہی ختم بھی ہو جاتا ہے-