کیا آپ بھی ٹماٹر فریج میں رکھتے ہیں؟ 6 چیزیں جو فریج میں رکھنے سے خراب ہوجاتی ہیں لیکن آپ کو خبر تک نہیں ہوتی

اگرچہ اس بات سے انکار ممکن نہیں ہے کہ ریفریجریٹرز انڈے اور دودھ جیسی غذاؤں کے حوالے سے بہترین محافظ کا کردار ادا کرتے ہیں، لیکن وہ بہت سی دوسری چیزوں کو ذخیرہ کرنے کے لیے واقعی ضروری نہیں ہیں۔ لیکن آپ کو کیسے پتہ چلے کہ کون سی مصنوعات کمرے کے درجہ حرارت پر زندہ رہ سکتی ہیں اور کون سی نہیں؟ تو آئیے ہم آپ کو یہ اہم معلومات فراہم کرتے ہیں وہ بھی سائنس کی مدد سے۔

ٹماٹر

نیشنل اکیڈمی آف سائنس کے ماہرین کا کہنا ہے کہ ٹماٹروں کو کمرے کے نارمل درجہ حرارت میں رکھنا بہترین ہوتا ہے- اگر اسے 12 ڈگری سینٹی گریڈ سے کم درجہ حرارت والی جگہ پر رکھا جائے تو اس کی ساخت اور ذائقے کو نقصان پہنچ سکتا ہے-

کیچپ

لوگوں کے درمیان اکثر اس بات پر بحث ہوتی ہے کہ کیچپ کو فریج میں رکھنا چاہیے یا الماری میں؟ لیکن اس بات کا انحصار آپ پر ہوتا ہے کہ آپ ٹھنڈی کیچپ کا ذائقہ پسند کرتے ہیں یا پھر کمرے کے نارمل درجہ حرارت میں رکھی گئی کیچپ- البتہ چونکہ کیچپ میں سوڈیم پایا جاتا ہے تو آپ اسے تقریباً ایک مہینے تک شیلف پر بھی رکھ سکتے ہیں یہ خراب نہیں ہوگی-

کیلے

یقیناً کیلے کو یہ سوچ کر فریج میں محفوظ کیا جاتا ہے کہ کھانے کی چیز ہے تو کہیں خراب نہ ہوجائے- لیکن سائنس کا کہنا ہے کہ کیلے کو اگر ٹھنڈے درجہ حرارت پر رکھا جائے تو اس کا پکنے کا عمل سست ہوجاتا ہے- یعنی فریج میں رکھنے سے کیلے نسبتاً کچے رہ جاتے ہیں- اگر آپ کے پاس کسی حد تک سبز کیلے موجود ہیں تو انہیں کمرے میں کاؤنٹر پر ہی رکھ دیں جلد ہی پیلے ہوجائیں گے-

ڈبل روٹی یا دیگر آٹے سے بنی اشیاﺀ

تازہ پکی ہوئی روٹی یا ڈبل روٹی کے کھانے سے بہتر کوئی چیز نہیں ہے اور فریج سے باسی نکالی گئی روٹی کھانے سے بدتر کوئی چیز نہیں ہے- آٹے میں موجود قدرتی اجزاﺀ ٹھنڈے ماحول میں درست انداز میں کام نہیں کرتے- اس لیے ڈبل روٹی کے پیس کو فریج میں رکھنے سے وہ خشک ہوجاتے ہیں- ڈبل روٹی یا روٹی ہمیشہ فریج میں رکھنے کے بجائے شیلف پر رکھیں-

آلو

آلو سرد موسم میں اپنی خصوصیات برقرار نہیں رکھ پاتے چاہے وہ میٹھے ہوں یا پھر پھیکے- کسانوں کے مطابق کم درجہ حرارت میں آلو کو رکھنے سے یہ اپنا ذائقہ کھو دیتا ہے- لوگ انہیں کمرے کے درجہ حرارت پر ہی کاغذ کے تھیلے میں محفوظ کر سکتے ہیں۔

کافی

نیشنل کافی ایسوسی ایشن کا کہنا ہے کہ کافی کے سب سے بڑے دشمن "ہوا، نمی، گرمی اور روشنی" ہیں۔ چونکہ فریج بڑے پیمانے پر نمی پائی جاتی ہے، تو اس لیے کافی کو وہاں رکھنا مناسب نہیں ہے۔ تنظیم کا مشورہ ہے کہ کافی کو فریج میں رکھنے کے بجائے ائیر ٹائٹ کنٹینرز یا جار میں رکھا جائے۔