باڈی لینگوئج سب بتا دیتی ہے اور۔۔ وہ 7 غلطیاں جو آپ کو فوری چھوڑ دینی چاہئیں ورنہ شرمندگی ہوسکتی ہے

ہم اکثر اپنی زبان سے کچھ بولتے ہیں لیکن ہمارا جسم کچھ اور ہی کہانی بیان کرتا ہے، باڈی لینگوئج احساسات سے متعلق ہوتی ہے جس میں انسانی جسم کا ہر عضو کچھ نہ کچھ کہتا ہے،انسان کی آنکھیں بہت کچھ بتا دیتی ہیں جبکہ جسم کے مخصوص اعضا بھی بہت کچھ کہہ جاتے ہیں۔ آج ہم آپ کو وہ باڈی لینگوئج کی وہ غلطیاں بتاتے ہیں جن کی وجہ سے دوسروں پر بہت کچھ عیاں ہوجاتا ہے۔

آنکھ

اکثر لوگ گفتگو کے دوران آنکھ چرانے کی کوشش کرتے ہیں جس سے آپ کے اعتماد کی کمی کا اظہار ہوتا ہے یا ناپسندیدگی ظاہر ہوتی ہے۔ یہ عادت آپ کو دوسروں کے سامنے کمزور ثابت کرسکتی ہے۔ اس لئے گفتگو کے دوران آنکھ چرانے اور ادھر ادھر آنکھیں گھمانے کے بجائے ایک جگہ فوکس رکھیں تاکہ آپ کی چھوٹی سی غلطی سے آپ کا اعتماد مجروح نہ ہوسکے۔

ساکن ہونا

کئی بار ہم دیکھتے ہیں کہ گفتگو کے دوران سامنے والا شخص بالکل ساکن نظر آتا ہے جس سے ایسا محسوس ہوتا ہے کہ شائد اس کو آپ کی بات میں کوئی دلچسپی نہیں ہے۔ ایسا کرنے سے آپ بھی دوسروں کے سامنے شرمندہ ہوسکتے ہیں۔ کوشش کریں کہ جب کسی سے بات کریں تو بالکل ساکن رہنے کی بجائے گفتگو کے دوران ہاتھوں اور اشاروں کا سہارا ضرور لیں تاکہ سامنے والے کو آپ کی دلچسپی کا اندازا ہوسکے۔

مسکین صورت

بات چیت کے دوران کئی بار لوگ چہرے پر مسکینی سجا لیتے ہیں جس سے سامنے والے پر بہت برا تاثر پڑتا ہے اور آپ کے کھوکھلے پن کا احساس ہوتا ہے۔ جب کسی سے بات کریں تو چہرے کے تاثرات کو کنٹرول میں رکھیں تاکہ وقت کے ساتھ اپنے کے چہرے کے اتار چڑھاؤ سے آپ کا اعتماد ظاہر ہو لیکن بہت زیادہ مسکرانے یا زیادہ سنجیدہ سے گریز کریں۔

سر کھجانا

کئی بار دیکھا گیا ہے کہ بات چیت کے دوران سامنے والا شخص بار بار سر کھجانے لگتا ہے لیکن آپ ایسا ہرگز نہ کریں کیونکہ آپ کی یہ عادت اپنے کے ذہن میں جاری کشمکش اور تناؤ کو دوسروں پر ظاہر کرنے کا سبب بن سکتی ہے۔ بات چیت کے دوران ہاتھوں کو بہت زیادہ نہیں صرف ضرورت کے اشاروں تک محدود رکھیں اور گردن یا سر کھجانے سے گریز کریں۔

ناخن چبانا

ایک اور عادت جو دوسرے لوگوں کو دکھاتی ہے کہ آپ گھبرائے ہوئے ہیں وہ ناخن چبانا ہے۔ جب آپ کسی کے سامنے بیٹھے ہوں تو کوشش کریں کہ ناخن چبانے سے گریز کریں کیونکہ آپ کی یہ عادت دوسروں پر آپ کی گھبراہٹ کا راز کھول دے گی اور سامنے والا آپ کی بات کو سنجیدہ لینے کی بجائے آپ کی اس چھوٹی سی حرکت کی وجہ سے نظر انداز بھی کرسکتا ہے۔

مصروف دکھانا

بات چیت کے دوران کئی جانیوالی غلطیوں میں خود کو بہت مصروف دکھانا بھی شامل ہے، جب آپ کسی سے بات کررہے ہوں تو اگر آپ کسی کام میں مصروف بھی ہیں تو بھی کچھ دیر کیلئے رک جائیں تاکہ سامنے والے کو ایسا نہ لگے کہ آپ بدتمیز یا بد لحاظ ہیں ۔ جب بھی کسی سے بات کریں تو یہ ظاہر کرنے کی کوشش کریں کہ جو شخص آپ سے کچھ کہہ رہا ہے اسے آپ بغور سن رہے ہیں اور آپ ان کا احترام کرتے ہیں۔

ہاتھ پاؤں چلانا

کچھ لوگ خود اعتمادی کی کمی کی وجہ سے جب کسی سے بات کرتے ہیں تو کرسی پر بیٹھے بیٹھے اپنی ٹانگوں کو ہلاتے یا بازوں کو بار بار مروڑتے رہتے ہیں لیکن آپ کی یہ عادت دوسروں کو یہ تاثر دے سکتی ہے کہ شائد آپ کو انکی بات میں کوئی دلچسپی نہیں۔ ایسا کرنے سے آپ بات چیت کا موقع گنواسکتے ہیں۔ کوشش کریں کہ جب کسی کے سامنے بیٹھے تو اپنے جسم کو غیر ضروری حرکت نہ دیں بلکہ اطمینان سے بیٹھیں تاکہ سامنے والے کو آپ کی کمزوری سے فائدہ اٹھانے کا موقع نہ ملے۔

< Previous میں یہاں آیا ہی کیوں٬ چند ہوٹل جو آپ کی چھٹیوں کو بھیانک خواب میں بدل کر رکھ دیں NEXT > ملکہ برطانیہ کی آخری رسومات پر کروڑوں پاؤنڈ خرچ٬ کس نے کتنی رقم دی؟