'چولہا چوکا' اور 'دھوکا' یہ ساری زندگی ہی
عورت کی روٹین میں گھڑی کی سوئیوں کی طرح پھدکتے ہی رہتے ہیں۔ پکانے کھانے
کی بات ہورہی ہے تو عورت تو اصل وہی ہے جو قلم پکڑسکے یا نہ مگر ڈوئی اور
چھری سنبھال بھی سکے ساتھ چلا بھی سکے۔
زندگی چلانے میں تو کھانے اور عورت سے کوئی انسان جتنی بھی جان چھڑانا چاہے
پھر بھی نہیں چھڑا سکتا کیونکہ ان دو کو زندگی سے نکال دیا جائے تو زندگی
کا مقصد بھی کوئی نہیں رہیگا۔ اور بقا ، وبا ل بن جائے گی۔۔۔۔۔۔۔۔۔۔۔۔۔۔۔۔۔۔۔۔۔
اسی لئے حسب ضرورت اور حسب ذائقہ انکو ساتھ لے کے چلنا صرف ضروری نہیں
انتہائی ضروری ہے۔ ویسے بھی ہمارے دیس کا دستور ہے غصہ گھر سے باہر جس پر
بھی ہو گھر کا آکر نکلتا ان دونوں پر ہی ہے۔
دونوں میں سے اگر انتخاب کرنا پڑ جائے کہ لکھنا ہے یا پکانا ہے تو مجھے
یقین ہے میرا انتخاب عورت ہونے کی بناء پر 'چولہا، چوکا' ہی ہوگا۔ جب ٹھیک
ٹھاک مدتوں پہلے بچپنا تھا اور پکانے کا شوق تھا تو دادی سے کام لے لے کر
کرنے کا شوق چڑھتا تھا تو دادی کہتی تھیں زندگی بھر یہی کرنا ہے تو 'ہانسا
اور جلاپا ' دونوں کا مظاہرہ میری طرف سے جواب میں کیا جاتا تھا۔
ہانسا تو اسلئے کہ کیا ہوا اتنا آسان تو کام ہے اور جلاپا اسلئے کہ سردی
میں خود مزے سے چولہےکے پاس ہیں مجھے جگہ دینے کا موڈ جو نئیں، اسلئے ٹالا
ہے۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ وقت نے ثابت کیا کہ انھوں نے لفظ بہ لفظ
ٹھیک کہا
جب پکانا سیکھنے کا ارادہ کیا تو خیال آیا کہ کیا پکا کر شروع کیا جائے
مغز، نہاری ، کوفتہ، پائے، بریانی، کٹاکٹ، روسٹ ، حلیم،
سجی۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ سب کھاتے ہوئے لگتا کہ بس ایک
چیز یوں اور دوسری یوں کرکے ڈالی اور لو بن گئی۔
مگر ترکیب دیکھنے پر اور طریقہ سننے پر خیال آیا کہ کھانا اور بات ہے پکانا
اور بات ہے ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ سو کوئی نیا جہاں ڈھونڈتے ہیں -
سو چاولوں سے شروعات کی تو عقدہ کھلا کہ چاول پکانے بھی اتنے آسان نہیں
جتنا نظر آتا ہے۔ چاول اور پانی کا تناسب بنانا بالکل ساس بہو کی آپس میں
بنانا ہے۔ذرا سی اونچ نیچ کئے کرائے پر پانی پھیر سکتی ہے۔ سو کبھی چاول کا
حلوہ اور کبھی چاول کی سخت سویاں بن گئیں ۔ مگر خدا خدا کرکے چاول اور پانی
کی صلح کروانا سیکھی۔
پھر بھائیوں کی فرمائش پر کڑاہی بنانے کا ارادہ کیا تو رعب جمانے کے لئے
ڈھونڈنا شروع کیا کہ براؤن ، وائٹ، پنک، مکھنی، چکنی، ریشمی ، بناسپتی،
روایتی، افغانی کونسی کڑاھی سیکھنی چاہئے۔ جب چار ناکام تجربات کرلئے تو
اندازہ ہوا کہ گوشت گلانا اور بھوننا اچھے سے ذیادہ ضروری ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ پھر بھلے کڑاہی جو بھی ہو وہ اچھی ضرور
لگتی ہے۔
سن سنا کر یہ اندازہ ہوا کہ جی دیسی کھانے کھائے زیادہ جاتے ہیں۔۔۔۔۔۔۔ مگر
بدیسی کھانے رعب زیادہ ڈالنے کے کام آتے ہیں سو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ان کے بارے میں چھان
پھٹک شروع کی ۔ بہت سے موے تو ایسے نکلے کہ جن کے نام تک پڑھنا مشکل
کیشئیونٹ چکن، جلفریزی، چلی گارلک، سیزلینگ سٹیک، بلیک پیپر چکن، شاشلک،
چلی ود کوریانڈر چکن بلا بلا بلا ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ پھر من چور ین
۔۔۔۔۔۔۔۔۔۔۔۔۔۔۔۔ یہ نام دل کو لگا اس کو بنانے کی کوشش کی تو اندازہ ہوا
کہ ان عجیب ناموں کے پیچھے عجیب اجزا ۔۔۔۔۔ اجینوموتو، پیپیریکا، مسٹرڈ،
سویا، چلی، تھائم، اوریگانو،،،،،،،،،، ڈھونڈنا ایک اور سیاپا ہے ۔
سو دل کو بہلاتے ہوئے خود کو سادے سے فاسٹ فوڈ کے لئے جدو جہد کرنے پر
مجبور کیا۔ پھر پتہ لگا کہ برگر، پیزا، پاستا، بریڈ سینڈوچ، شوارما، رول،
ان کو کھانے میں جتنا کم وقت خرچ ہوتا ہے دس سے ضرب کھا کر وہ وقت انسان کو
انکو بنانے میں لگتا ہے۔
ایک ایک کرکے سب کچھ کر ڈالا اور پھر خیال آیا کہ میٹھا بنا لیا جائے ویسے
بھی نیک کام کی شروعات تو انسان کو کسی میٹھے سے ہی کرنی چاہئے سو کسٹرڈ سے
شروعات کرنے کی ٹھانی مگر یہاں بھی مسئلہ وہی تناسب بنانے والا تھا اور
تناسب میں اونچ اور نیچ خاصی ذیادہ ہونے کی بناء پر
۔۔۔۔۔۔۔۔۔۔۔۔۔۔۔۔۔۔۔۔۔۔۔ کسٹرڈ اتنا سخت بنا جو کہ کسی کے سر پر دے مارنے
کے کام بھی آسکتا تھا۔
فرنی کھیر گاجر کا حلوہ گُڑ کے چاول زردہ کھا کھا کر دیکھے پکتے ہوئے بھی
دیکھے اور ایک پیر کچن سے باہر رکھ کر ہی دیکھے کہ۔۔۔۔۔۔۔۔۔۔۔۔۔۔۔۔۔۔۔۔۔
کہیں کچھ کرنا نہ پڑ جائے-
پھر خیال آیا کہ روٹی ایک اچھا آپشن ہے سو جب بیلنی اور توے پر سینکنی شروع
کی تو جو پاپڑ اور نقشے بنے وہ ایسے بنے جو صرف ابا کے دل کو بھائے اور سب
روٹی بازار سے لا کے پیٹ بھر پائے ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سو پھر یادداشت دوڑائی کہ کچھ تو ایسا ہونا چاہئے حو میرے ہاتھوں شامت
بلوانے سے بچ گیا ہو
تو یاد آیا انڈہ اور چائے
سو مدتوں انڈا ہی مختلف شکل میں بنا بنا کر کھلائے اور بھوک کو مٹانے کے
انتظام کروائے۔
مگر آخر کب تک جب اماں اور ابا کی اماں کو یاد آگیا کہ کچھ نہ آئے تو زندگی
کیسے گزاری جائے سو پکا پکا کر جلا جلا کر مجھے ہی کھلا کھلا کر اتنا تو
سکھا ہی دیا کہ اب جب بھی کچھ اچھا پکا نا ہو سو قرعہ فال میرے نام ہی
نکلتا ہے۔
سو زندگی میں کتنا ہی برا آغاز ہو کوشش جاری رکھی جائے تو کامیابی ضرور
ملتی ہے صرف لگن سے کرنا اور سیکھنا ضروری ہوتا ہے۔ |