پاکستانی فوج کی جانب سے آبدوز سے کروز میزائل 'بابر تھری'
فائر کرنے کا کامیاب تجربہ کرلیا گیا ہے جس نے خشکی پر موجود اپنے ہدف کو
کامیابی سے نشانہ بنایا ہے۔
|
|
آئی ایس پی آر کے مطابق جدید ٹیکنالوجی سے آراستہ بابر تھری کروز میزائل کا
تجربہ بحیرہ ہند سے کیا گیا اور یہ میزائل 450 کلو میٹر تک اپنے ہدف کو
کامیابی سے نشانہ بنانے کی صلاحیت رکھتا ہے۔
پاکستانی فوج نے تجرباتی طور پر یہ میزائل زیرِ سمندر موبائل پلیٹ فارم سے
لانچ کیا تھا۔ بابر تھری کروز میزائل نچلی پرواز کرنے کی صلاحیت رکھتا ہے
اور اپنے ساتھ کئی ہتھیار بھی لے جاسکتا ہے-
کامیاب تجربے پر چیئرمین جوائنٹ چیفس آف سٹاف کمیٹی جنرل زبیر محمود حیات،
ڈی جی سٹرٹیجک پلان ڈویژن لیفٹیننٹ مظہر جمیل اور دیگر سینیئر افسران نے
میزائل ٹیسٹ کے تجربے کا مشاہدہ کیا۔
|
|
واضح رہے کہ اس سے قبل گزشتہ سال دسمبر میں پاکستانی فوج نے زمین اور سمندر
میں 700 کلومیٹر تک اپنے ہدف کو نشانہ بنانے والے کروز میزائل 'بابر ٹو' کا
بھی تجربہ کیا اور وہ بھی کامیابی سے ہمکنار ہوا تھا۔ |