ایسا قصبہ جس کے باشندے سوتے رہتے ہیں

کہتے ہیں کہ نیند ایسی چیز ہے جو کہ سولی پر بھی آ جاتی ہے لیکن آپ اس قصبے کے بارے میں کیا کہیں گے جس کے باشندے کئی کئی دن تک سوئے رہتے ہیں- شاید آپ کو یقین نہ آئے لیکن یہ حقیقت ہے کہ دنیا میں واقعی ایک ایسا مقام بھی ہے جہاں کے رہنے والوں پر بعض اوقات طویل مدت کے لیے نیند طاری ہوجاتی ہے-

درحقیقت یہ نیند ایک پراسرار بیماری ہے جس کا شکار اکثر یہاں کے مختلف افراد بنتے رہتے ہیں- دوسری جانب سائنسدان تاحال ان وجوہات کو تلاش کرنے میں کوشاں ہیں جس کے باعث سوویت یونین کے دور کے ایک قصبے کے باشندوں پر ہر وقت نیند طاری رہتی ہے-
 

یہ قصبہ قازقستان کے ایک گاؤں کے نزدیک واقع ہے اور کالاچی کے نام سے جانا جاتا ہے جبکہ اسے اس پراسرار بیماری کی وجہ سے سویا ہوا گاؤں بھی کہا جاتا ہے-

قازقستان کے علاقے کالاچی اور اس کے پڑوسی روسی گاؤں Krasnogorsk میں درجنوں مقامی افراد اس پراسرار طبی حالت میں گرفتار ہو چکے ہیں اور اس کا شکار افراد دو سے چھ دن تک نیند کی حالت میں رہتے ہیں-

یہ طبی حالت اس حد خطرناک ثابت ہوچکی ہے کہ اس بیماری کی تشخیص سے قبل ایک بزرگ کو مردہ سمجھ کر زندہ دفنایا بھی جاچکا ہے-

یہ بیماری لہروں کی شکل میں آتی ہے جیسے کہ اس کی ایک لہر مئی 2013 میں آئی اور اسی طرح رواں سال بھی مئی میں ہی لوگ شکار ہوئے-

یہاں تک کہ بعض رہائشی تو اپنا سامان بھی یہ سوچ کر تیار رکھتے ہیں کہ کبھی بھی اسپتال جانے کی ضرورت پڑی سکتی ہے-