دنیا کے بڑے شہر، چند دلچسپ اعداد و شمار اور حقائق

آج کل دنیا کی پچاس فیصد سے زیادہ آبادی شہروں میں رہ رہی ہے۔ اقوام متحدہ کے اندازوں کے مطابق سن 2030ء تک دنیا کی دو تہائی آبادی شہروں میں رہ رہی ہو گی۔ مزید یہ کہ تب ساٹھ فیصد شہری آبادی بچوں اور نوعمروں پر مشتمل ہو گی۔

ڈوئچے ویلے کا دنیا کے بڑے شہروں کے حوالے سے چند دلچسپ حقائق بیان کرتے ہوئے کہنا ہے کہ وقت کے ساتھ ساتھ شہر زیادہ سے زیادہ بڑے بھی ہوتے جا رہے ہیں۔ 1975ء میں صرف نیویارک، ٹوکیو اور میکسیکو سٹی میں دَس ملین سے زیادہ نفوس رہ رہے تھے۔ 2009ء میں ایسے ’میگا سٹیز‘ کی تعداد اکیس تھی جبکہ 2025ء تک اِن کی تعداد بڑھ کر اُنتیس ہو جانے کا قوی امکان ہے۔
 

رواں سال کے لیے اقوام متحدہ کے اعداد و شمار کے مطابق سب سے بڑا شہر ٹوکیو ہے، جس کی آبادی سینتیس ملین ہے۔ ٹوکیو کے بعد نئی دہلی (24.2 ملین)، ممبئی (21.8ملین)، ساؤ پاؤلو (21.3 ملین)، میکسیکو سٹی (20.1 ملین) اور نیویارک (20.0 ملین) کا نمبر آتا ہے۔

یہ بھی ایک حقیقت ہے کہ انسانوں کی اقتصادی خوشحالی میں شہروں کا حصہ ستّر فیصد سے بھی زیادہ بنتا ہے۔ دوسری جانب دنیا بھر میں چوبیس فیصد شہری آبادی پسماندہ کچی بستیوں کی مکین ہے۔ سن 2000ء کے بعد سے شہروں کی آبادی میں پچپن ملین نئے نفوس کا اضافہ ہوا ہے۔

دنیا بھر کے شہر کرہ ارض کے صرف دو فیصد رقبے کو ڈھکے ہوئے ہیں لیکن نہ صرف 78 فیصد توانائی استعمال کرتے ہیں بلکہ اِن شہروں سے فضا کے لیے ضرر رساں گیسوں کے اخراج کا تناسب بھی ساٹھ فیصد ہے۔