بہادرآباد کے بنگلے سے کروڑوں روپے مالیت کا 100 تولے سونا چرانے والی 2 گھریلو ملازماؤں کو پولیس پکڑنے میں تاحال کامیاب نہ ہوسکی۔ بتایا جاتا ہے کہ مذکورہ عورتیں جرائم پیشہ ہیں اور پہلے بھی کئی وارداتیں کرچکی ہیں۔
بہادرآباد کے علاقے میں چار مینار کے قریب بنگلے سے بھی مذکورہ عورتوں نے 15 تولے کے قریب سونا چوری کیا تھا، جہاں انھوں نے ملازمت اختیار کرتے وقت اپنے نام دلشاد اور نادیہ بتائے تھے۔
ماسیوں نے ملازمت حاصل کرنے کے 10 سے 15 دن بعد پانچ تاریخ کو واردات انجام دی، متاثرہ فیملی نے واردات کی اطلاع نیو ٹاؤن پولیس کو کردی ہے۔
پولیس کے مطابق بہادر آباد کی ایک اور فیملی نے بھی ملازماؤں کو شناخت کرلیا، پولیس کا کہنا ہے کہ چار مینار کے قریب واردات کے بعد مذکورہ ماسیوں نے محمد علی سوسائٹی میں کام ڈھونڈا۔ جہاں واردات کے بعد وہ فرار ہوگئیں۔
پولیس حکام کے مطابق نیو ٹاؤن کے علاقے میں ایک واردات ہوئی تھی، متاثرین مکینوں کو شک ہے کہ یہ واردات بھی انہی ماسیوں نے کی ہے۔
پولیس کا کہنا ہے کہ کل ایک لڑکے نے درخواست دی ہے، پولیس حکام تفتیش کر رہے ہیں اور دونوں ماسیوں کی تلاش شروع کردی گئی ہے۔ پولیس کے مطابق سوسائٹی کے سیکیورٹی گارڈ کے بھی بیانات قلمبند کیے جا رہے ہیں۔