مشرقی پاکستان سے بنگلہ دیش تک - نویں قسط

ٹارچ کی روشنی جدھر سے آ رہی تھی اس طرف پنجاب پولیس کے پانچ جوان جو ٹیلیگراف کے بوسٹر ٹاور کی حفاظت پر متعین تھے ان میں سے حوالدار حیدری جن کا تعلق کیمبل پور سے تھا اُن کی سرگوشی کی طرح آواز آئی، کیوں بھئی جوانوں ٹھیک ہو ؟ جواب میں زلفی نے بھی ویسے ہی انداز میں جواب دیا، ہم لوگ اللہ کے فضل سے ٹھیک ہیں آپ لوگ کیسے ہیں ؟ حیدری صاحب ہاتھ میں رائفل لیے کمر جھکائے آہستہ آہستہ ادھر اُدھر دیکھتے ہوئے ہمارے پاس آئے جہاں ہم لوگ برآمدے کے ستونوں کی آڑ لیے ہوئے تھے انہوں نے ٹارچ کی روشنی سے چاروں طرف کا جائزہ لیتے ہوئے کہا،لگتا ہے حملہ آور ابھی کہیں آس پاس ہی چھپے ہوئے ہیں جو دوبارہ حملہ کر سکتے ہیں ہم لوگوں کو ہشیار رہنا چاہیے آج سونا بھول جائیں اور جن کے پاس اسلحہ ہے وہ میرے ساتھ آئیں ہم لوگ آ س پاس اچھی طرح تسلی کر لیں کہ کوئی چھپا ہوا تو نہیں ہے جو ہمیں بے خبر پا کر دوبارہ حملہ کر دے۔ قارئین کو بتاتا چلوں کہ ہم میں سے ایک عزیز بھائی نے بندوق کا لائسنس اور خورشید بھائی نے پستول کا حاصل کر لیا تھا جو مغربی پاکستانی ہونے کی وجہ سے ایک دن میں بن گیا اور چار دن پہلے ہی انہوں نے یہ دونوں چیزیں خریدی تھیں ۔صبح تک ہم لوگ جاگتے رہے اور ایک دوسرے سے اپنا اپنا اظہار خیال کرتے رہے۔

ہم لوگ جہاں تھے اُس جگہ کو وہاں کے لوگ مقامی زبان میں ”کاٹا پہاڑ“ کے نام سے اس لیے پکارتے تھے کہ دو چھوٹی ایک ساتھ ملی ہوئی پہاڑیوں کو بیچ سے کاٹ کر سڑک بنا ئی گئی تھی جس کے ایک طرف کی پہاڑی پر ہم لوگوں کی رہائش تھی جبکہ دوسری طرف پہاڑی پر ایک ہندوﺅں کا مندر تھا، ہم پر حملہ اسی مندر والی پہاڑی سے کسی نے دستی بم سے کیا تھا مگر فاصلہ زیادہ ہونے کی وجہ سے بم ہم تک نہیں پہنچ سکا اور پہاڑیوں کے درمیان گزرنے والی سڑک پر لگے ایک بجلی کے کھمبے پر گرا جس سے کھمبے کی جگہ ایک بہت بڑا گڑھا بن گیا جسے ہم نے صبح کے وقت جا کر دیکھا اور اللہ کا شکر ادا کیا کہ اُسی کی رحمت سے ہم لوگ اس جان لیوا حملے میں محفوظ رہے ۔

اسی دن اخبار میں خبر پڑھ کر سب جاننے والوں کے فون آتے رہے کچھ لوگ خود آ کر ملے اور محتاط رہنے کی تاکید کرتے رہے جبکہ ہم لوگ اس حملے سے پہلے اتنے لاپرواہ تھے کہ روزانہ قریبی دو تین سینماﺅں میں ایسے ہی جا گھستے کیونکہ کوئی ٹکٹ نہیں لگتی تھی گیٹ کیپر پہچانتے تھے ، ہمیں دیکھتے ہی ہنستے ہنستے گیٹ کھول دیتے ، ہم لوگ تھوڑی تھوڑ ی دو تین جگہ پکچر دیکھ کر واپس آ جاتے ،مگر اس واقعے کے بعد باہر جانا بالکل ضرورت کے تحت ہوتا ، یہ واقعہ ہمارے لیے خطرے کا الارم ثابت ہوا کہ اس کے بعد سینما پیلس میں دھماکہ ہوا جس میں بہت سی جانیں گئیں ایک دن بعد اسی سینما کے سامنے دن دیہاڑے سڑک پر دستی بم کے حملے میں ایک سائیکل رکشہ چلانے والے کے ساتھ اور تین آدمی موقع پر مارے گئے، معلوم ہوتا تھا مکتی باہنی والوں کو کھلی آزادی مل گئی تھی جہاں چاہتے کھلم کھلا دستی بم مار کر یہ جا وہ جا۔۔۔

دو تین دن ایسے ہی گزر گئے آخر کب تک گھر بیٹھتے ، زلفی نے کپتائی جانے کا پروگرام بنایا تو پہلے تو سب نے حالات کی طرف توجہ دلائی جو زلفی نے یہ کہہ کر سب کو خاموش کر دیا کہ آئے دن ہوائی حادثات ہوتے رہتے ہیں ،تو کیا لوگ سفر کرنا چھوڑ دیتے ہیں ؟ بھائیوں موت کا وقت تو معین ہے ،اگر آنی ہوتی تو بم کے حملے میں آ جاتی ، سب کی طرف نظریں گھوماتے ہوئے سوالیہ انداز میں بولے،کیا خیال ؟کچھ نے نیم رضامندی اور کچھ دوستوں نے زور دے کر حمایت کرتے ہوئے کہا ، بالکل ٹھیک کہا تم نے مارنے والوں نے تو گھر پر ہی مارنے کا پرگرام بنایا تھا، مرنا ہوا تو میدان میں لڑ کر مریں گے چوہوں کی طرح بل میں چھپ کر نہیں بیٹھیں گے، اس طرح اگلی اتوار کو کپتائی کا پروگرام بن گیا ، ٹیلگراف آفس کی ویگن میں کھانے پکانے کا سامان رکھا اور دو مقامی لڑکوں اور ڈرائیور کو ساتھ کے کر ہم لوگ کپتائی ڈیم کی طرف روانہ ہوئے۔

کپتائی ایک پہاڑی علاقہ ہے جو چٹاگانگ سے تقریباً پینتالیس کو میٹر ہے جہاں ایک بہت بڑی قدرتی جھیل پر ایک ڈیم بنایا گیا ہے ، جہاں پانی سے بجلی پیدا کی جاتی ہے وہیں سے دریائے کرنافلی نکل کر چٹاگانگ آکر خلیج بنگال میں گرتا ہے،اِسی دریا کے کنارے کرنافلی پیپر مل ہے جہاں بانس سے کاغذ تیار کیا جاتا ہے۔