|
ووٹ ایک ملی و قومی ذمہ داری ہے اور شریعت میں اس کی
حیثیت شہادت کی ہے۔ ووٹ کو مفاد پرستی، سڑکوں، گلی کوچوں، کھمبوں،
ٹرانسفارمروں اور آلوپیاز کی بھینٹ نہ چڑھایا جائے ۔ یاد رکھیں ووٹر جس
امیدوار کے حق میں ووٹ ڈالتا ہے، وہ درحقیقت اس کے حق میں گواہی دیتا ہے کہ
یہ امیدوار میرے علم کے مطابق اقتدار و اختیار کا دیگر امیدواروں کی نسبت
زیادہ مستحق ہےاوراگرحلقے میں کوئی بہتر اور قابل امیدوار موجود ہے تو اسے
ووٹ نہ دینا شرعاً ممنوع اور قوم و ملت پر ظلم کے مترادف ہے۔
قرآن مجید میں گواہی کے متعلق اللہ تعالیٰ کا فرمان ہے:
" يَا أَيُّهَا الَّذِينَ آمَنُواْ كُونُواْ قَوَّامِينَ بِالْقِسْطِ
شُهَدَاءَ لِلّٰهِ وَلَوْ عَلَى أَنفُسِكُمْ أَوِ الْوَالِدَيْنِ
وَالْأَقْرَبِينَ إِن يَكُنْ غَنِيًّا أَوْ فَقِيرًا فَاللّهُ أَوْلَى
بِهِمَا"
ترجمہ: اے ایمان والو! تم انصاف پر مضبوطی کے ساتھ قائم رہنے والے (محض)
اللہ کے لئے گواہی دینے والے ہو جاؤ خواہ (گواہی) خود تمہارے اپنے یا (تمہارے)
والدین یا (تمہارے) رشتہ داروں کے ہی خلاف ہو، اگرچہ (جس کے خلاف گواہی ہو)
مال دار ہے یا محتاج، اللہ ان دونوں کا (تم سے) زیادہ خیر خواہ ہے۔
(سورۃ النساء، آیت 135)
|