|
چین نے 1978 میں اصلاحات اور کھلے پن کا آغاز کیا تھا۔
گزشتہ 46 سالوں میں چین ایک غریب اور غیر ترقی یافتہ معیشت سے دنیا کی
دوسری سب سے بڑی معیشت میں تبدیل ہو چکا ہے۔چینی صدر شی جن پھنگ نے 2023
میں ایک سمپوزیم میں کہا تھا کہ "اصلاحات اور کھلا پن ایک بڑی وجہ ہے کہ
چین وقت سے ہم آہنگ ہونے کے قابل ہے"۔ انہوں نے مزید کہا کہ "چینی جدیدیت
کو فروغ دینے کے لئے، ہمیں اصلاحات اور کھلے پن کو مزید جامع طور پر گہرا
کرنا ہوگا، سماجی پیداواری قوتوں کو مسلسل آزاد اور ترقی دینا ہوگی، اور
سماجی زندگی کو فروغ دینا اور بڑھانا ہوگا۔
اسی سلسلے کو آگے بڑھاتے ہوئےکمیونسٹ پارٹی آف چائنا کی 20 ویں سینٹرل
کمیٹی کے تیسرے کل رکنی اجلاس کا انعقاد بیجنگ میں کیا گیا۔ اجلاس میں
اصلاحات کو مزید گہرا کرنے اور چینی جدیدکاری کو آگے بڑھانے پر توجہ مرکوز
کی گئی ہے۔ماہرین کے نزدیک چین اب اپنے اصلاحاتی عمل میں "گہرے پانی" کے
زون میں داخل ہو چکا ہے اور اسے پہلے کے مقابلے میں زیادہ پیچیدہ اور فوری
نوعیت کے اہداف درپیش ہیں، جن میں ماضی کی اصلاحات کی کم ہوتی تاثیر،
مستقبل میں اصلاحات کا غیر واضح راستہ اور بدلتے ہوئے بین الاقوامی تعلقات
وغیرہ جیسے امور شامل ہیں۔اس ضمن میں چینی حکام کی کوشش ہے کہ بدلتے دور کے
تقاضوں سے ہم آہنگ مزید اصلاحات کے ذریعے معاشرے، معیشت، ثقافت اور سیاست
میں مختلف چیلنجوں سے نمٹا جائے.
مبصرین کے خیال میں جیسے جیسے دنیا بھر میں سائنس ٹیک انقلاب اور صنعتی
تبدیلی کا ایک نیا دور جنم لے رہا ہے، اور جیسے جیسے سائنس ٹیک مسابقت شدت
اختیار کر رہی ہے، چین کی تکنیکی جدت طرازی کے لیے گہری اصلاحات بھی ضروری
ہیں، جو ملک کے مستقبل کے لیے "فیصلہ کن" ہے۔ چینی صدرشی جن پھنگ واضح کر
چکے ہیں کہ "چین کی مزید ترقی کو درپیش تضادات اور چیلنجوں کے سلسلے کو حل
کرنے کے لئے، ہمیں اصلاحات اور کھلے پن کو گہرا کرنا ہوگا"۔ ویسے بھی شی جن
پھنگ نے ہمیشہ اصلاحات کو گہرا کرنے کو بہت اہمیت دی ہے۔ 2012 میں کمیونسٹ
پارٹی آف چائنا کی سینٹرل کمیٹی کے جنرل سکریٹری کا عہدہ سنبھالنے کے ایک
سال بعد ، مرکزی حکومت نے اصلاحات کو جامع طور پر گہرا کرنے کا فیصلہ کیا ،
جس کا مقصد چینی خصوصیات کے حامل سوشلسٹ نظام کو بہتر بنانا اور ترقی دینا
اور چین کے حکمرانی کے نظام اور صلاحیت کو جدید بنانا تھا۔
اس کے بعد سے، چین کی قیادت نے مجموعی اصلاحات کو گہرا کرنے کے لئے ایک روڈ
میپ پیش کیا ہے، اور ملک نے تین ہزار سے زیادہ اصلاحاتی منصوبے بھی تیار
کیے ہیں جن میں پارٹی اور ریاستی ادارہ جاتی اصلاحات، دیہی اراضی اصلاحات،
سرکاری ملکیت میں انٹرپرائز اصلاحات، مالیاتی اصلاحات، سبز تبدیلی اور طبی
نظام کی اصلاحات شامل ہیں.تمام اصلاحات میں اقتصادی اصلاحات مرکزی توجہ کا
محور ہیں۔ شی جن پھنگ نے وسائل کی تقسیم میں مارکیٹ کے "فیصلہ کن" کردار کی
وکالت کی ہے ، جو پالیسی ایڈجسٹمنٹ کا ایک مضبوط اشارہ ہے ۔
شی جن پھنگ کی ہدایت کی روشنی میں چین نے نجی کاروباری اداروں کی مدد کے
لیے ایک پرائیویٹ اکانومی ڈیولپمنٹ بیورو قائم کیا، نجی اداروں کے لیے
فنانسنگ کی سہولت کے لیے مالیاتی اصلاحات کو فروغ دیا، جدید انٹرپرائز سسٹم
کو مزید بہتر بنانے کے لیے جدید سرکاری ملکیت والے انٹرپرائز (ایس او ای)
اصلاحات کو فروغ دیا، اور مارکیٹ تک رسائی کے لیے منفی فہرست کے نظام کو
نافذ کیا، جس سے ان علاقوں میں داخلے کی اجازت دی گئی جو فہرست میں واضح
طور پر ممنوع نہیں ہیں۔اصلاحات کے نتائج قابل ذکر رہے ہیں۔ ایس او ای
اصلاحات (2020-2022) کے لئے تین سالہ ایکشن پلان نے 165000 سے زیادہ ایس او
ایز کو محدود ذمہ داری والی کمپنیوں ، یا حصص کے ذریعہ محدود کمپنیوں میں
تبدیل کردیا ، اور تقریباً 38000 ایس او ایز نے بورڈ آف ڈائریکٹرز قائم
کیے۔ 2012 سے 2023 تک ، چین میں نجی کاروباری اداروں کی تعداد میں چار گنا
سے زیادہ اضافہ ہوا ، اور کاروباری اداروں کی کل تعداد کے تناسب کے طور پر
نجی کاروباری اداروں کی تعداد 80 فیصد سے بڑھ کر 92 فیصد سے زیادہ
ہوگئی۔یہی وجہ ہے کہ2020 میں جاری ہونے والی ورلڈ بینک کی ایک رپورٹ میں
کہا گیا ہے کہ اپنی مستحکم اور مضبوط اصلاحات کی وجہ سے چین نے اپنے
کاروباری ماحول میں غیر معمولی بہتری دیکھی ہے اور اسے لگاتار دو سال تک
ٹاپ 10 عالمی اصلاح کاروں میں شامل کیا گیا ہے۔
|