نوجوان قوم کاسرمایہ ہیں۔
نوجوانوں نے ملک کی باگ ڈور سنبھالنی ہے۔ نوجوان ہی ملک کی طاقت ہیں۔ یہ وہ
نعرے ہیں جو آج کل ہمارے سیاستدان جلسے اور جلسوں میں لگا کر نوجوانوں کے
خون کو گرما رہے ہیں۔ یہ حقیقت ہے جب کسی کو متوجہ کرکے اس کے حق میں بات
کی جائے تو وہ بہت جذباتی انداز میں سوچنے پر مجبور ہوجاتا ہے۔اب اسی طرح
ہمارے سیاستدان نوجوانوں کے جذباتوں کو ابھار کر ان کواپنی سیاست کے لیے
استعمال کررہے ہیں۔ پچھلے چند سالوں سے سیاسی جماعتیں نوجوانوں کے جذبات کو
بڑے ہی جذباتی طریقے سے استعمال کررہی ہیں۔ عمران خان کو سب سے زیادہ
نوجوانوں نے کندھا پر اٹھایاہواہے ۔ جدھر نظر اٹھاؤ آپ کوپی ٹی ٓئی کی
نوجوان قیادت نظر آئی گی۔ اس کی وجہ عمران خان کا نعرہ وہ تھا ”کہ ملک میں
انقلاب لانا ہے اور اس کے لیے نوجوانوں کو آگے بڑھنا ہوگا“۔
میں عمران خان کا کرکٹ کے دور سے شیدائی ہوں۔ عمران خان کی وجہ سے کرکٹ
رسالہ اخباروطن خریدا کرتا تھا۔ اس کے مختلف پوز کاٹ کاٹ کر اپنی ڈائری میں
لگایا کرتا تھا۔اس کا ایک سپیشل رسالہ نکلاتھا”عمران ہمارا ہے“ اس کی قیمت
اس وقت 50روپے تھی جو میرے لیے خریدنا بہت مشکل تھا مگر میں نے وہ بھی
خریدا۔ عمران خا ن کا باؤلنگ سٹائل سے لیکر بیٹنگ تک ہر انداز کو دیوانہ
وار پسند کرتا تھا۔عمران خان ایک کامیاب کرکٹر ہونے کے ساتھ ساتھ اچھا
کپتان بھی ثابت ہوا۔ عمران خان کے خلاف کرکٹ میں بھی بہت سیاست ہوئی مگر اس
نے ان سب کو ناکام کیا اور ایک کامیاب کپتان ہونے کا ثبوت 92ءکا ورلڈکپ
جیتا کر دیا۔میں آج بھی میں عمران خان کو بہت اچھا سمجھتا ہوں مگر نہ جان
کیوں سیاست میں مجھے کچھ فلاپ ہوتا ہوا نظر آرہا ہے ۔ کرکٹ کے دور میں اس
کے فیصلے پٹھانوں کی طرح دوٹوک اور اٹل ہوتے تھے مگر سیاسی میدان میںروایتی
سیاستدانوں کی طرح صبح کچھ اور شام میں کچھ ۔
جب خان صاحب نے انقلاب کا نعرہ لگادیا تو اب ان کو نوجوانوں پر انحصار کرنا
چاہیے تھا۔کیونکہ کوئی بھی بزرگ براہ رست بزرگ نہیں بن جاتا بلکہ نوجوانی
کے دور سے نکل کر بنتا ہے۔ بوڑھے اورملک لوٹنے والے سیاستدان تو پہلے بھی
دوسری جماعتو ں میں موجود ہیں تو پھر عمران خان کو ایسے لوگو کوشامل کرنے
کی کیا ضرورت پڑی ہے؟پاکستان کے کسی بھی شہر میں تحریک انصاف کا موازنہ
کرلو سب سے زیادہ نوجوان اس پارٹی سے وابستہ ملیں گے۔
عمران خا ن کا یہ نعرہ کہ ”ہمیں بڑے ناموں کی نہیں نوجوانوں کی ضروت ہے“ وہ
آج عمران خان نے خود فلاپ کردیا ۔اپنے یوتھ کنونشن میں عمران خان کے اس
اعلان نے کہ 25فیصد ٹکٹ نوجوانوں کو دیں گے ۔انہوں نے ان نوجوانوں کو بہت
زیادہ مایوس کردیا ہے۔ نوجوان تو سوچ رہے تھے کہ کم ازکم 75فیصد کوٹہ ان کا
ہے اور باقی پر روایتی سیاستدان ہونگے مگر آج کے اس اعلان کے بعد خان صاحب
کو معلوم ہوجائے گا کہ اونٹ کس کروٹ بیٹھتا ہے؟ 25فیصد نہیں تو 20 فیصد تو
کئی جماعتوں میں ٹکٹ نوجوانوں کو مل جاتے ہیں۔ ( بےشک وہ سیاسی وڈیروں کی
اولادمیں سے ہی کیوں نہ ہو ) عمران خان کو چاہیے کہ وہ کسی معجزے کا انتظار
کرنے کی بجائے اپنے ٹکٹ ہولڈرز کا اعلان کردے تاکہ وہ امیدوار ابھی سے اپنے
حلقے میں اپنی پوزیشن مضبوط کرسکیں کیونکہ عمران خان کی جماعت کا یہ پہلا
الیکشن ہے ۔
نوجوانوں کاتو بس نام استعمال ہورہا ہے ۔سیاست میں جیسے جیسے الیکشن نزدیک
آرہا ہے ایسی ہی سیاسی خاندان کے چشم وچراغ متحرک ہورہے ہیں اور جن
نوجوانوںنے پارٹی کے لیے دن رات ایک کیا وہ پیچھے ہوتے جارہے ہیںاور جنہوں
نے چوری کھانی ہے وہ آگے آرہے ہیں۔ کہیں پر نوجوانوں میں لیپ ٹاپ تقسیم کیے
جارہے ہیں تووہ بھی اپنے اپنے حساب سے ۔ کسی کو بے نظیر انکم سپورٹ دی
جارہی ہے تو وہ بھی اندھا بانٹے ریوڑھی والے حساب سے۔
اب نوجوانوں کواپنے بارے میں سوچنا ہوگا۔ اور اس مورثی اور مفاد پرست کی
سیاست سے پرہیز کرنا ہوگا ۔ اگر نوجوانوں نے ہی ملک کی تقدیر بدلنی ہے اور
انقلاب لانا ہے تو پھر اس کی باگ دوڑ ان کے ہاتھ میں دینا ہوگی۔ نوجوانوں
کو ملکی مفاد اور اپنے ملک کی بقا کے لیے اہم قدم اٹھا نا ہونگے ۔ کسی
دوسرے کے مفاد کی بجائے اپنے ملک کی حفاظت اور ترقی کے لیے صف اول میں کھڑا
ہونا پڑے گا۔تاکہ ہمارا ملک دن دگنی اور رات چوگنی ترقی کرسکے۔ |