بچوں کا اغواء خوف اور درپردہ مقاصد

(Syed Amjad Hussain Bukhari, Lahore)

رانا ٹاؤن لاہور کے نواح میں موجود ایک پسماندہ ہاوسنگ سوسائٹی ہے، جہاں پر ملک کے دور دراز علاقوں سے لاہور مزدوری کے لئے آئے ہوئے افراد آباد ہیں۔ گذشتہ روز میں وہاں کچھ دوستوں سے ملنے کے لئے گیا ۔ جس گھر میں مقیم تھا وہاں سے دس سال کے ایک بچے کو ٹھنڈا پانی لینے کے لئے گھر کے دروازے سے ملحقہ دکان پر بھیجنا چاہا مگر اس بچے کی والدہ پاؤں پڑ گئیں کہ میرے بچے کو پانی لینے نہ بھیجیں میں اس غیر متوقع رویہ سے یکدم پریشان ہوگیا۔ان سے وجہ جاننا چاہی تو ایک لمبی داستان سننے کو ملی۔ ان کے پاس موجود خبروں کے مطابق ان کے محلے سے تین بچے پکڑے گئے۔ کون بچے تھے؟ کس کے بچے تھے؟ اس بارے میں انہیں کوئی معلومات نہیں تھی۔پھر انہوں نے بتایا کہ ایک برقع پوش خاتون ایک بچے کو اغوا کرکے لے جا رہی تھی بچے نے شور ڈالا تو مقامی لوگوں نے اس خاتون کو پکڑ کر پولیس کے حوالے کیا۔ تھانہ رانا ٹاؤن سے اس واقعہ کے بارے میں معلومات لینا چاہی اور پوچھا بھی گیا کہ لوگوں نے کسی اغوا کار خاتون کو پکڑ کر پولیس کے حوالے کیا؟ وہاں موجود اہلکاروں نے اس واقعہ سے مکمل انکار کیا۔ یہ تو ایک چھوٹی سوسائٹی کی داستان ہے۔ راقم رانا ٹاؤن کے بعد جی ٹی روڈ پر موجود دیگر رہائشی علاقوں رچنا ٹاؤن، امامیہ کالونی، شاہدرہ وغیرہ میں بھی گیا وہاں پر بھی تمام علاقوں میں ایسی ہی افواہوں کا بازار گرم تھا۔ لوگ بچوں کو گھروں سے باہر بھیجتے ہوئے پریشان تھے، اکثر تعلیمی ادارے جو گرمیوں کی چھٹیوں کے بعد کھل گئے تھے ایک بار پھر بند کردئیے گئے ہیں۔ ایک نجی سکول کے پرنسپل سے اس حوالے سے بات ہوئی تو انہوں نے بتایا لوگ بچوں کو سکول بھیجنا ہی نہیں چاہتے۔ خوف اور سراسیمگی کی فضاء ہے۔ لوگوں کا انتظامیہ، پولیس اور سیکورٹی کے اداروں سے اعتماد ختم ہوگیا۔ انہوں نے خدشہ ظاہر کیا کہ کوئی نادیدہ قوتیں ملک میں ایسی فضاء قائم کرکے اپنے مقاصد حاصل کر رہی ہیں۔ لیکن مجھے بھی باقی باتوں کی طرح یہ بات بھی ایک افواء ہی لگی۔ نجی یونیورسٹی میں نفسیات کی معلمہ دردانہ مقدس سے جب گفتگو کی تو انہوں نے کہا کہ ایسے واقعات سے بچوں اور والدین پر بہت خوفناک اثرات مرتب ہو رہے ہیں ۔ اس خوف سے نکلنے کے لئے والدین اور بچوں کو ایک طویل وقت درکار ہوگا۔ نجی ٹی وی چینل سے وابستہ صحافی شیراز حسنات کا کہنا تھا کہ واقعات میں حقیقت کم اور افواہوں کا زیادہ عمل دخل ہے۔گذشتہ دنوں آئی جی پنجاب پولیس مشتاق سکھیرا اور آیڈیشنل آئی جی آپریشنزشہزادہ سلطان نے بچوں کے اغواء کے بڑھتے ہوئے واقعات کے حوالے سے مشترکہ پریس کانفرنس کی ۔اس موقع پر سیکرٹری داخلہ پنجاب میجر(ر) اعظم سلمان بھی موجود تھے۔پریس کانفرنس کرتے ہوئے انسپکٹر جنرل پنجاب مشتاق احمد سکھیرا کا کہنا تھا کہ2011ء سے لیکر جولائی 2016ء تک 6793 بچے مسنگ تھے، جن میں سے 6661 گھروں میں واپس پہنچ گئے یا انھیں بازیاب کر الیا گیا، اس وقت چائلڈ پروٹیکشن اینڈ ویلفیئر بیورو کے پاس 168 بچے موجود ہیں جن کے والدین اور عزیزو اقارب کو تلاش کرنے کے لیے ہمہ وقت کوششیں جاری ہیں۔انہوں نے کہا کہ اس سال اغوا برائے تاوان کے ابتک صرف 4 کیسسز درج ہوئے تھے اور اغوا ہونے والے چاروں بچے بحفاظت بازیاب کرلیے گئے تھے، جبکہ 2015میں اغواء برائے تاوان کے 16کیسز در ج کئے گئے تھے۔آئی جی پنجاب کا کہنا تھا کہ صرف گزشتہ دو 2015-16 میں صوبے بھر میں 1901 بچے لاپتہ ہوئے۔ جن میں سے 1532 خود بہ خود گھروں کو واپس آگئے جبکہ 283 کو پولیس کی مدد سے ان کے والدین تک پہنچایا گیا۔میں واپس آنے والے 1808 بچوں سے کی گئی پوچھ گچھ کے بعدجووجوہات سامنے آئیں اس کے مطابق، 795 بچے والدین کے سخت رویہ ، 138 خاندانی جھگڑوں ، 111 میاں بیوی کی علیحدگی، 83 سکولوں یا مدرسوں میں بدسلوکی، 74 رشتہ داروں کے ساتھ ، 51 جبری مشقت یا بھیک مانگنے، 42 جنسی زیادتی، 29 معذوری کی بناء پر جبکہ 392 ماں باپ سے بچھڑنے والے بچے شامل تھے۔پریس کانفرنس کے دوران صحافیوں نے ان سے سوال کئے تو انہوں نے ایک سوال کا جواب دیتے ہوئے کہاکہ لاہور میں اغواء ہونے والے تمام بچوں کا ڈیٹا میرے پاس نہیں ایک دو روز میں سار ڈیٹا اکٹھا کرنے کے بعد میڈیا کوآگاہ کردوں گا جبکہ ایک اور سوال کے جواب میں بتایا کہ میرے علم میں ایسی کوئی بات نہیں جس میں 2گرفتار ملزمان میں سے ایک نے انکشاف کیا ہوا کہ اس نے 100سے زیادہ بچے اغوا ء کر کے کراچی بھجوائے ہواگر کوئی ایسی بات ہوئی تو اس کیلئے سپیشل ٹیم تشکیل دی جائے گی جو ان بچوں کو بازیاب کروائے گی۔لاہور پریس کلب میں موجود صحافیوں نے الزام عائد کیا کہ میڈیا اس سارے مسئلے کی جڑہے، میڈیا میں جان بوجھ کر ایسے واقعات کو رپورٹ کرکے خوف و ہراس کی کیفیت پھیلائی جا رہی ہے۔ دوسری جانب بچوں کے والدین کا رویہ متشدد ہوتا جا رہا ہے، ہر اجنبی کو دیکھ کر اس کی خوب دھلائی کی جاتی ہے کل لاہور میں اپنے بچے کو ویکسین کے لئے لے جانے والے باپ کو مشتعل ہجوم نے اغوا ء کار سمجھ کر خوب دھلائی کی، اسی طرح ایک روز قبل مغلپورہ میں ایک شریف غبارے والے کو بھی مار مار کر لہولہان کر دیا گیا اور ایسی کئی خبریں روز سننے کو مل رہی ہیں۔ ان کیسز کے حوالے سے جب مختلف ذرائع سے جاننے کی کوشش کی تو معلوم ہوا کہ کیس روٹین کے مطابق ہوئے ہیں لیکن میڈیا اسے بہت زیادہ ہوا دے رہا ہے جس کی وج سے لوگوں میں خوف وہراس پایا جا رہا ہے اور یہی وجہ ہے کہ لوگوں کو جس پر بھی شک گذرتا ہے اس کی ایسی کی تیسی کر نا شروع ہو جاتی ہے۔ خدانخواستہ معاملات اگر یونہی رہے تو مجھے ڈر ہے کہ کل ایسے ہی کسی بے گناہ کو مشتعل لوگوں کا ہجوم کسی معصوم کی جان ہی نہ لے بیٹھے۔ اگر ایسا ہو تا ہے تو اس میں سب سے بڑا مجرم ہمارا میڈیا ہو گا۔اس حوالے سے لاہور میں موجود کرائم رپورٹرز کی ذمہ داری بنتی ہے کہ وہ ایسے واقعات کو اپنے چینل کی ریٹنگ بڑھانے کا ذریعہ بنانے کی بجائے قومی مفاد کو ترجیح دیں گے۔ میڈیا کے کوڈز آف اتھیکس اور اپنے ملی فرائض کی پاسداری کریں گے۔ پولیس افسران کے حمایتی یا مخالف بننے کی بجائے اس دھرتی کے فرزندہونے کا ثبوت دیں گے۔اس وقت ٹیبل سٹوریز کرنے کی بجائے لاہور کی تنگ و تاریک گلیوں میں ایک دفعہ ضرور جائیں جہاں رپورٹرز کی بریکنگ نیوز کے پیچھے لگنے والی دوڑ نے کتنے گھروں میں اندھیرے کر دئیے ہیں،کتنے لوگ خوف کی وجہ سے اپنے بچوں کو گھروں سے نکلنے نہیں دے رہے۔ کتنی معصوم بچیوں کی گڑیاں صندوق میں بند کر کے رکھ دی گئی ہیں۔ ایک دفعہ اندرون شہر کی تاریکی میں مایوسی پھیلاتی افواہوں پر بھی خبر بنا کر اپنے چینل کو بھیجیں ، آپ ریاست کے چوتھے ستون کے محافظ ہیں۔ جب محافظ ہی ستون کو دیمک لگ کر کھانا شروع کردیں تو عمارت کیوں کر قائم رہ سکے گی۔

< PREVIOUS ذرا نم ہو تو ،،،،،،،،،،،،،NEXT > 11اگست کیلنڈر میں ایک اہم دن

Comments

11 Aug, 2016

About the Author: Syed Amjad Hussain Bukhari Read More Articles by Syed Amjad Hussain Bukhari: 21 Articles with 17398 viewsCurrently, no details found about the author. If you are the author of this Article, Please update or create your Profile here.

Add Your Article

Article Categories

Politics سیاست Society & Culture معاشرہ اور ثقافت Religion مذہب Other/Miscellaneous متفرق Literature & Humor ادب و مزاح Education تعلیم Health صحت Famous Personalities مشہور شخصیات Science & Technology سائنس / ٹیکنالوجی Novel افسانہ Sports کھیل True Stories سچی کہانیاں Books Intro تعارفِ کتب Travel & Tourism سیر و سیاحت Career کیریر Entertainment انٹرٹینمنٹ Kids Corner بچوں کی دنیا Poetry شعر و شاعری 100 Lafzon Ke Kahani سو لفظوں کی کہانی Young Writers نوجوان قلم کار Arts ہنر Military Democracy سول فوجی جمہوریت Hamariweb Writers Club ہماری ویب رائٹرز کلب Step By Step

Recent Society & Culture Articles

نوجوانوں کو فنی مہارتیں سکھائیں

چین انٹرنیٹ کی سب سے بڑی عالمی مارکیٹ

ارتقاءِ انسانی کی تیسری سیڑھی(حصہ دوم)

ﺗﻮﮨﻢ ﭘﺮﺳﺘﯽ ﺍﻭﺭ ﺗﺸﺪﺩ ﮐﺎ ﺩﻝ ﺩﮨﻼ ﺩﯾﻨﮯ ﻭﺍﻻ ﻭﺍﻗﻌﮧ، ﺫﻣﮧ ﺩﺍﺭ ﮐﻮﻥ؟

View all Society & Culture Articles