بھارت اور کشمیر ، سینٹ میں منظورشدہ پالیسی نکات!

قومی سلامتی اور خارجہ امور کی نگرانی پارلیمنٹ کے ذریعے کرنے کا معاملہ اہم ہے کیونکہ اس وقت تک کشمیر کاز سے متعلق تمام امورغیر سیاسی بنیادوں پر چلائے جا رہے ہیں جس سے کشمیر کاز کے علاوہ پاکستان کے مفادات کو بھی کئی بار شدید نقصانات سے دوچار ہونا پڑا ہے۔بلاشبہ پالیسی بنانے اور چلانے میںپارلیمنٹ کی بالادستی ناگز یر ہے تاہم اس کے لئے ارکان پارلیمنٹ کی اہلیت و قابلیت بہتر بنانے کے ساتھ پارلیمنٹ کے لئے کشمیریوںسے مشاورت کا سلسلہ شروع اور مشاورت کے عمل کو باقاعدہ شکل دینا بھی ضروری ہے۔کشمیر کاز ،کشمیریوں کی اخلاقی ،سیاسی اور سفارتی حمایت کو غیر سیاسی بنیادوں پر ہی نہ چلایا جائے،کشمیر کاز سے متعلق سیاسی امور،سیاسی ذرائع سے ہی بروئے کار لائے جائیں۔پاکستان خود کو کشمیریوں کا وکیل کہتا ہے اور پاکستان کی پارلیمنٹ عوامی جذبات اور رائے کی عکاس ہے۔پارلیمنٹ نے بھارت اور کشمیر کاز کے حوالے سے مستقل بنیادوں پر پالیسی بنانے سے متعلق جن سفارشات کی منظوری دی ہے،ان سفارشات کی روشنی میںبھارت اور کشمیر کاز سے متعلق پالیسی بناتے ہوئے اگر کشمیریوں کی مشاورت بھی شامل کی جائے تو کسی خرابی کا موجب نہ ہو گا،بلکہ کشمیری یقین دلاتے ہیں کہ ایسا کرنا کشمیر کاز ہی نہیں خود پاکستان کے بھی وسیع تر مفاد میں ہے۔کشمیریوں سے مشاورت،کشمیریوں کی اخلاقی،سیاسی ،سفارتی مدد کو خامیوں اور خرابیوں سے محفوظ بنانے، کشمیریوں کی جدوجہد آزادی کے حوالے سے پاکستان کے کردار کے تعین سے متعلق مزید امور کی شمولیت سے پاکستان کی کشمیر پالیسی اوربھارت سے نمٹنے پر موثر طور پر پیش رفت کی جا سکتی ہے۔

موجودہ صورتحال میں اس بات کی ضرورت اشد معلوم ہوتی ہے کہ پاکستان مسئلہ کشمیر کے حوالے سے مضبوطی سے ''سٹینڈ'' لے،اپنی پالیسی سے اقوام عالم پر یہ واضح کیا جائے کہ پاکستان مسئلہ کشمیر کے لئے کیا کیا مضبوط اقدامات اٹھا سکتا ہے۔پاکستان کی طرف سے مسئلہ کشمیر کو اولین ترجیح قرار دینے سے ہی اقوام عالم مسئلہ کشمیر کے پرامن اور منصفانہ حل کی جانب راغب کیا جا سکتا ہے۔اسے وقت کہ جب بھارت نہتے کشمیریوں کے خلاف فوج کشی میں مصروف ہے،پاکستان کے خلاف جنگی ماحول کا دبائو ڈال رہا ہے،ایسے وقت میں ہمیںبھارت سے متعلق مضبوط پالیسی اپنانے اور مضبوط اقدامات کی ضرورت ہے،اس وقت کمزوری اور بھارتی شرائط پر مفاہمت کے رجحان سے گریز کرنا چاہئے۔