محکمہ موسمیات نے کراچی سمیت سندھ بھر میں آج آندھی اور بوندا باندی کی پیش گوئی کر دی ہے اور سندھ کے دیگر شہروں میں بھی بادلوں کے ڈیرے ہیں جس کے باعث یہاں بھی بادلوں کے برسنے کے قوی امکانات ہیں۔
محکمہ موسمیات کا کہنا ہے کہ شہر قائد میں کم سے کم درجہ حرارت 30 ڈگری سینٹی گریڈ ریکارڈ کیا گیا اور زیادہ سے زیادہ درجہ حرارت 37 ڈگری سینٹی گریڈ ریکارڈ تک جانے کا امکان ہے جبکہ شہر میں چلنے والی ہوا میں نمی کا تنا سب 62 فیصد ہے۔
اس کے علاوہ جنوبی پنجاب، شمال و مشرقی بلوچستان، سندھ، گلگت بلتستان اور کشمیر میں بھی گرج چمک کے ساتھ بارش کا امکان ہے۔ جبکہ محکمہ موسمیات کے مطابق ملک کے دیگر شہروں میں موسم گرم و مرطوب رہے گا۔
واضح رہے کہ محکمہ موسمیات کی پیش گوئی کے مطابق گزشتہ روز سندھ،
بالائی و جنوبی پنجاب، بالائی خیبر پختونخواہ، کشمیر، گلگت بلتستان اور شمال مشرقی بلوچستان میں آندھی اور گرج چمک کیساتھ بارش ہوئی ہے۔