ہمارے معاشرے میں اکثر والدین سے بے حد پیار کیا جاتا ہے، چاہے کھانے کے حوالے سے ہو، یا کپڑوں کے حوالے سے۔ ہر لحاظ سے والدین بچوں کا اور بچے والدین کا خیال رکھتے ہیں۔
لیکن کچھ ایسے بھی ہوتے ہیں جو کہ اپنے والدین سے اپنی محبت کے اظہار کو بیان نہیں کر پاتے ہیں۔ اکثر ماں کے ساتھ لاڈ پیار کیا جاتا ہے اور باپ کو بنا ظاہر کیے پیار کرتے ہیں۔
سوشل میڈیا ایک ایسا پلیٹ فارم ہے جہاں ہر کوئی اپنے تاثرات کا اظہار کرتا ہے، لیکن ایک یوٹیوبر نے کچھ ایسا کیا ہے جس نے سب کو جذباتی کر دیا ہے۔
یوٹیوبر نے ایک ایسی ویڈیو بنائی ہے جس میں وہ نوجوانوں سے گھر کال کر کے اپنے والد سے اپنی محبت کا اظہار کرنے کو کہتا ہے۔ اس ویڈیو کے بارے میں میں پڑھتے ہوئے ہو سکتا ہے آپ کو وہ جذبات محسوس نہ ہوں، جو کہ ایک باپ اور بیٹے کی گفتگو سننے سے ہونگے۔
اس ویڈیو میں دیکھا جا سکتا ہے کہ نوجوان نے والد کو کال کر کے کہا کہ میں آپ سے پیار کرتا ہوں، جس پر والد حیران ہو گئے، ان کی حیرانگی سے اندازہ ہو رہا تھا کہ وہ بیٹے سے اس قسم کے جذبات کی امید نہیں رکھتے تھے۔ جبکہ جواب میں والد نے بھی بیٹے سے محبت کا اظہار کیا۔
اسی طرح ایک اور نوجوان نے جب والد کو کال کی اور اپنی محبت کا اظہار کیا تو والد ہکا بکا رہ گئے، ان کی آواز سے اندازہ لگایا جا سکتا ہے کہ والد بھی حیران تھے کہ گویا بیٹا کچھ ایسا اقدام اٹھانے جا رہا ہے جو پہلے نہیں اٹھایا تھا یا بیٹے کی طبیعت ٹھیک نہیں ہے۔
ان جذبات نے نہ صرف باپ بیٹے کے رشتے کو مظبوط کیا بلکہ دیکھنے والوں کو بھی جذباتی کر دیا تھا۔