سوشل میڈیا پر ایسی کئی ویڈیوز اور تصاویر دیکھی ہوں گی جس میں کچھ ایسی معلومات شئیر کی جاتی ہیں جو کہ دلچسپ ہوتی ہیں۔
ہماری ویب ڈاٹ کام کی اس خبر میں آپ کو اسی حوالے سے بتائیں گے۔
عام طور پر پاکستانی جب کبھی کوئی مصالحے دار چیز کھاتے ہیں تو ساتھ چٹنی کا استعمال لازمی کرتے ہیں چاہے پھر وہ دال ہو یا پھر مصالحے دار انڈہ، کباب ہوں یا پھر سموسے، اور پھر پکوڑے ہوں یا پھر رول۔
پاکستانی ہر چیز میں چٹنی کو شامل کر ہی لیتے ہیں، لیکن کیا ہی بات ہو اگر ٹماٹر اور کھٹی ذائقہ دار چٹنی کا ملاپ ہو اور چٹنی میں آپ سموسے، پکوڑے اور کباب ڈبو کر کھائیں؟ ایسی من پسند چٹنی عام طور پر ہر وہ شخص ڈھونڈتا ہے جسے کچھ تیکھا کھانے کی عادت ہوتی ہے۔
ایسی ہی ایک چٹنی کی دکان پشاور میں واقع ہے جہاں صرف چٹنی تیار کی جاتی ہے اور اس چٹنی کے لیے آنے والوں کو انتظار بھی کرنا پڑتا ہے، یہاں تک کہ بھیڑ لگ جاتی ہے، یہ ویڈیو پاکستان اسٹریٹ فوڈ کی جانب سے اپلوڈ کی گئی تھی۔
اب اتنا رش ہوتا ہے تو کچھ تو بات ہوگی نا، خیر اس اسٹال نما دکان کا مالک بھی منفرد انداز میں گراہکوں کے دل جیت لیتا ہے، قصہ خوانی بازار میں موجود اس چٹنی کی خاص بات اس میں شامل املی کا ہونا بھی ہے۔
اس چٹنی کو تیار کرنے کے لیے سب سے پہلے گرینڈر میں ٹماٹر ڈالے جاتے ہیں اور پھر دھنیا پودینہ اور ہری مرچوں کو شامل کیا جاتا ہے، اس کے بعد اس چٹنی کی خاصیت ایک ایسا مصالحہ ہے جو کہ ان کا اپنا فارمولا ہے۔
اس سب کو گرینڈر میں ڈالا جاتا ہے اور پھر مزید ٹماٹروں کو ڈالا جاتا ہے، ساتھ ہی نمک کا استعمال بھی کیا جاتا ہے۔ جب یہ چٹنی اپنی آخری صورت میں دکھائی دیتی ہے تو دیکھنے والے کے منہ میں پانی ضرور لے آتی ہے۔
کیونکہ مصالحہ دار اور کھٹی چٹنی کا ایسا ملاپ ہے جو کہ نہ زیادہ کھٹی ہوتی ہے اور نہ زیادہ تیکھی۔
رمضان کے موقع پر اگر آپ پشاور کے رہائشی ہیں تو اس چٹنی کا استعمال افطاری میں ضرور کر سکتے ہیں۔