اس وقت ملک میں شدید گرمی کا موسم شروع ہوچکا ہے۔ جہاں کچھ لوگ گرمی کم کرنے کے لئے مہنگے مہنگے اے سی خرید رہے ہیں وہاں ایسے لوگ بھی ہیں جو مہنگے اپلائنسز خریدنے کی اسطاعت نہیں رکھتے نہ ہی اے سی استعمال کرنے پر ہر ماہ بھاری بل کی ادائیگی کرسکتے ہیں۔ ایسے میں ائیر کولرز پاکستانیوں کے لئے بہترین انتخاب ہیں۔ جہاں یہ اے سی کے مقابلے میں جیب پر زیادہ بھاری نہیں پڑتے وہیں ان کی ہوا بھی اے سی کے مقابلے میں مضرِ صحت نہیں ہوتی۔ اس آرٹیکل میں ہم آپ کو ائیر کولرز کی مختلف اقسام، ان کی قیمتیں اور دیگر فوائد سے آگاہ کریں گے۔
ائیر کولر کی اقسام
پاکستان میں 5 طرح کے روم کولرز باآسانی مارکیٹ میں دستیاب ہیں آپ اپنی ضرورت اور بجٹ کے حساب سے انتخاب کرسکتے ہیں۔ روم کولرز کی اقسام اور ان کی تفصیل بمہ قیمت درجِ ذیل ہے۔
لکڑی کا روم کولر
یہ روم کولر کافی سستا ہے اور الیکٹرانک مارکیٹس کے بجائے عام دکانوں پر بھی دستیاب ہے کیوں کہ یہ دکان دار ایادہ تر خود بناتے ہیں۔ اگر کسی اچھی دکان سے لیا جائے تو اس کا معیار بھی بہتر ہوتا ہے البتہ لکڑی گلنے کی وجہ سے یہ ایک سے دو سال میں خراب بھی ہوجاتا ہے۔
قیمت
لکڑی کے روم کولر کی قیمت 3 سے 6 ہزار تک ہے
ڈیزرٹ کولر
ڈیزرٹ کولر سائز میں کافی بڑے ہوتے ہیں اور عموماً کارخانوں وغیرہ میں استعمال کیے جاتے ہیں ۔ڈیزرٹ کولر شدید گرم موسم میں بھی کمرے کو اچھا خاصہ ٹھنڈا کرنے کی صلاحیت رکھتے ہیں۔ ڈیزرٹ ائیر کولر میں پانی کا ٹینک 30 سے 60 لیٹر پانی جمع کرنے کی گنجائش رکھتا ہے۔ گھروں میں عام استعمال کے لئے یہ ائیر کولر مناسب نہیں کیونکہ اس میں پانی بہت خرچ ہوتا ہے اور اگر پانی ایک یا دو دن استعمال نہ ہوسکے تو اس میں بدبو پیدا ہوجاتی ہے۔
قیمت
ڈیزرٹ ائیر کولر کی قیمت پاکستان میں 20,000 سے شروع ہوتی ہے۔
روم کولر
اگر چہ روم کولر، ڈیزرٹ کولر سے چھوٹا ہوتا ہے لیکن کام اسی طرح کرتا ہے یعنی ٹینکی میں موجود پانی کو بخارات کی صورت میں ہوا کے ساتھ پھیلاتا ہے اور کمرے کو ٹھنڈا کرتا ہے۔ روم کولر گھریلو استعمال کے لئے بہترین ہے۔ روزانہ روم کولر استعمال کرنے کے لئے ضروری ہے کہ اس میں روزانہ پانی بھرا جائے۔
قیمت
روم کولر عام طور پر 11000 سے20,000 تک مل جاتے ہیں۔
پرسنل یا ذاتی ائیر کولر
یہ چھوٹے سائز کے ائیر کولرز ہوتے ہیں۔ پرسنل کولرز چھوٹی جگہ اور بند کمرے یا اسٹدی روم وغیرہ میں استعمال کے لئے مناسب ہیں۔ پرسنل کولرز میں 20 سے 30 لیٹر پانی کی گنجائش ہوتی ہے۔
قیمت
پرسنل کولرز 10,000 تک مل جاتے ہیں
ریموٹ کنٹرول والا ائیر کولر
یہ کوئی نئی قسم نہیں بلکہ ڈیزرٹ کولر اور روم کولر اب ریموٹ کنٹرول کے ساتھ بھی مارکیٹ میں دستیاب ہیں۔ ٹیکنالوجی کی جدت کی وجہ سے ان کا استعمال آسان ہے۔
قیمت
ریموٹ کنٹرول کے ساتھ ملنے والے ائیر کولر کی قیمت 25,000 سے شروع ہوتی ہے۔