خواتین کو کہیں جانا ہو تو یا تو گھر کے مردوں کی منتیں کرنی پڑتی ہیں یا ہزاروں روپے کرایے میں خرچ کرکے رکشہ یا ٹیکسی کی خدمت لی جاتی ہے کیونکہ پبلک ٹرانسپورٹ کا تو سرے سے شہر میں کوئی وجود ہی نہیں۔ لیکن اب کراچی کی لڑکیوں اور خواتین کو بھی اس مصیبت سے بہت جلد چھٹکارا ملنے والا ہے کیونکہ موڈ موبلٹی کمپنی نے خواتین کے لئے سی سیریز میں بننے والی ای بائیک کا نمونہ پیش کردیا ہے۔ اس موٹر سائیکل کی کیا خصوصیات ہیں آئیے جانتے ہیں۔

گزشتہ دنوں لاہور میں منعقد ہونے والے پاکستان آٹو شو میں موڈ موبلٹی نے اس جدید موٹر سائیکل کا نمونہ پیش کیا جسے بنیادی طور پر مشہور زمانہ 125موٹر سائیکل کو مدنظر رکھ کر بنایا گیا ہے۔

موٹر سائیکل کی رفتار

موٹر سائیکل کی رفتار فی فارج 75 کلومیٹر اور رینج بھی 75 کلومیٹر ہے۔ اس موٹر سائیکل میں ایک اور دو کلو واٹ کی موٹر کے آپشن موجود ہیں جو کہ 2 کلو واٹ فی گھنٹہ کی بیٹری سے منسلک ہیں۔

مارکیٹ میں کب تک آجائے گی؟

موڈ موبلٹی کے سی ای او شاہ طلحہ سہیل کا کہنا ہے کہ جدید موٹر سائیکل خواتین کے لئے آرام دہ اور تیز رفتار فراہم کرنے کے لئے بنائی گئی ہے جس کا نمونہ عوام میں کافی پسند کیا جارہا ہے۔ موٹر سائیکل کی پیداوار کے حوالے سے کمپنی کا کہنا ہے کہ مکمل ٹیسٹنگ اور جانچ پڑتال کے بعد تقریباً اگلے سال کے شروع میں یہ موٹر-سائیکل فروخت کے لئے مارکیٹ میں آجائے گی۔