دنیا کے مقبول ترین اورہر دلعزیز امریکی جج فرینک کیپریو کی ایک تصویر ان دنوں سوشل میڈیا پر وائرل ہے جس میں انہیں اپنا بیگ اٹھاکر ایئر پورٹ سے باہر آتے دیکھا جاسکتا ہے۔
سوشل میڈیا صارفین نے فرینک کیپریو کی اس تصویر پر بھرپور پسندیدگی کا اظہار کرتے ہوئے کہا ہے کہ مقدمات کے فوری فیصلے کرنے، انسان دوستی اور ہمدردانہ رویئے کی وجہ سے دنیا بھر میں کروڑوں لوگ ان کے مداح ہیں۔
فرینک کیپریو کی عدالت کی کارروائی ٹیلی ویژن پر دکھائی جاتی ہے، کلپس ہزاروں لاکھوں لوگ شیئرکرتے ہیں لیکن ان کی سادگی معاشرے کیلئے اعلیٰ مثال ہے، نہ کوئی پروٹوکول نہ کوئی ملازم یا محافظ، اپنا بیگ خود اٹھا کر جارہے ہیں اور ہمارے ملک میں ایک سرکاری افسر کے آگے پیچھے بھی درجنوں گاڑیوں کا قافلہ ہوتا ہے۔
سوشل میڈیا پر مشہور امریکی جج فرینک کیپریو کا اپنی عدالت میں ان کیمرہ مقدمات کی سماعت اور انصاف کے حوالے سے کہنا ہے کہ کامیابی کی سیڑھی چڑھنا ہی کافی نہیں بلکہ اس سیڑھی کو نیچے سے اوپر آنے والے دوسرے لوگوں کی مدد کے لیے وہیں رکھے رہنے دینا بھی اہم ہے۔