یوم آزادی کی مناسبت سے اسٹیٹ بینک آف پاکستان کی جانب سے پاکستان کو 75 سال مکمل ہونے پر 75 روپے کے کرنسی نوٹ کا ایک خوبصورت ڈیزائن آرٹ جاری کیا گیا ہے۔
پاکستان کی ڈائمنڈ جوبلی ہوچکی ہے اور اسٹیٹ بینک آف پاکستان نے اس موقع پر عوام کو خوشخبری سناتے ہوئے 75 روپے کے نوٹ کا ڈیزائن جاری کیا ہے جو عوام کو بہت جلد دستیاب ہوگا۔
اس نوٹ کی سب سے خاص بات یہ ہے کہ اس یادگاری نوٹ کے ڈیزائن میں پاکستان کے بانی قائد اعظم، شاعرِ مشرق علامہ اقبال، سرسید احمد خان اور فاطمہ جناح کی تصاویر ہیں۔
اسٹیٹ بینک کا اس حوالے سے کہنا ہے کہ کرنسی نوٹ پر تصاویر تحریک پاکستان کی کوششوں کے اعتراف میں دی گئی ہیں جبکہ اس کی پشت پر مارخور کی تصویر پائیدار ماحول پر توجہ کی عکاسی کر رہی ہے۔
رپورٹ کے مطابق یہ نوٹ ماہ ستمبر 2022 کے آخری ہفتے میں عوام کے لیے دستیاب ہوگا۔