جشنِ آزادی کے موقع پر اسلام آباد میں ایک افسوسناک واقعہ پیش آیا جب 2 غیر ملکی خواتین کو شہری نوجوانوں نے ہراساں کرنا شروع کیا، اب اس پر آئی جی اسلام آباد نے سخت نوٹس لے لیا ہے۔
ذرائع کے مطابق آئی جی اسلام آباد ڈاکٹر اکبر ناصر خان کی جانب سے ملزمان کے خلاف سخت نوٹس لیتے ہوئے فوری گرفتاری کا حکم دیا گیا ہے۔
اسلام آباد کے علاقے شکر پڑیاں میں گزشتہ روز غیرملکی خواتین سیاح کو ہراساں کرنے کے جرم میں آئی جی نے نوٹس لیا اور واقعے کا مقدمہ درج کر کے تفتیش شروع کردی گئی ہے۔
پولیس نے کہا ہے کہ ملزمان کی شناخت کے لیے نادرا کی خدمات لی جا رہی ہیں تمام ملزمان کو گرفتار کر کے انہیں سزا دی جائے گی۔
اُدھر غیرملکی خواتین کو ہراساں کرنے کی ویڈیوز سوشل میڈیا پر وائرل ہونے کے بعد سوشل میڈیا صارفین نے شدید غصے کا اظہار کیا ہے ساتھ ہی ان ملزمان کے خلاف سخت کارروائی کا مطالبہ کیا گیا ہے۔