اسلام آباد :سابق وزیراعظم عمران خان کی براہ راست تقریر پر پیمرا کی پابندی اسلام آباد ہائی کورٹ نے ختم کردی۔
عمران خان نے براہ راست تقریر نشر کرنے پر عائد پابندی کو اسلام آباد ہائی کورٹ میں چیلنج کیا تھا جس پر چیف جسٹس اطہر من اللہ کے روبرو سماعت ہوئی، چیف جسٹس نے عمران خان کی تقاریر ٹی وی چینلز پر براہ راست دکھانے کی اجازت دیتے ہوئے پیمرا کا پابندی کا نوٹیفکیشن معطل کرتے ہوئے پیمرا اور اٹارٹی جنرل کو نوٹس جاری کردیئے ہیں۔
دوران سماعت چیف جسٹس اسلام آباد کورٹ نے کہا کہ بادی النظر میں پیمرا نے عمران خان کی تقریر پر پابندی لگا کر اختیار سے تجاوز کیا، موجودہ حالات میں عمران خان کی تقریر پر پابندی کی کوئی مناسب وجہ نظر نہیں آئی، پیمرا کا نوٹیفکیشن آئندہ سماعت 5 سمتبر تک معطل رہے گا۔
واضح رہے کہ 21 اگست کو پیمرا نے پی ٹی آئی چیئرمین کی تقریر براہ راست نشر کرنے پر پابندی عائد کردی تھی، پیمرا کی جانب سے جاری اعلامیے میں ٹی وی چینلز کو ہدایت کی گئی تھی کہ وہ عمران خان کی ریکارڈ کی ہوئی تقریر نشر کرسکتے ہیں تاہم براہ راست تقریر اور خطاب نشر کرنے پر پابندی ہے۔
اعلامیے کے مطابق عمران خان کی تقریر پر پیمرا آرڈیننس 2002 کے سیکشن 27 کے تحت پابندی ہوگی۔