آج کی سب سے اہم خبر نے لوگوں کو انتہائی تشویش میں مبتلا کر دیا جس سے متعلق سوشل میڈیا پر کافی بحث جاری ہے وہ یہ کہ لندن سے چوری کی گئی ایک مہنگی ترین گاڑی کراچی سے ملی ہے جس پر کئی سوالات اٹھ رہے ہیں۔
دی نیوز کی رپورٹ کے مطابق کراچی میں کسٹم حکام کی جانب سے ایک مہنگی گاڑی 'Bentley Mulsanne' برآمد کر لی گئی ہے جسے لندن سے چوری کیا گیا تھا اور پھر بندرگاہ سے شہر بھیج دیا گیا تھا۔ گاڑی کی قیمت (تقریباً 250000 پاؤنڈ) جو پاکستانی کرنسی کے مطابق 6 کروڑ 31 لاکھ سے زائد بنتی ہے۔
کلکٹریٹ آف کسٹمز انفورسمنٹ (سی سی ای)، کراچی نے تصدیق کی ہے کہ برطانیہ کے انٹیلی جنس ادارے نے پاکستانی حکام کو اطلاع دی کہ چوری کی گاڑی کراچی کے ڈی ایچ اے علاقے میں ایک گھر میں کھڑی ہے۔
فیڈرل بورڈ آف ریونیو کے کلکٹریٹ آف کسٹمز نے اپنے ایک بیان میں کہا کہ ایک دوست ملک کی قومی ایجنسی کی قابل اعتماد رپورٹ موصول ہوئی ہے جس کے مطابق ایک گرے رنگ کی بینٹلی ملسن، V8 آٹومیٹک، VIN نمبر SCBBA63Y7FC001375، انجن نمبر CKB304693 جو لندن سے چوری کی گئی تھی ایجنسی نے عندیہ دیتے ہوئے کہا کہ مذکورہ گاڑی اس وقت کراچی کے علاقے ڈی ایچ اے میں موجود ہے۔
جس گھر سے گاڑی برآمد ہوئی وہاں کے رہائشی جمیل شفیع نے کسٹمز حکام کو بتایا کہ اسے نوید بلوانی نامی شخص نےگاڑی دلوائی ہے، کسٹمز نے دونوں افراد کو گرفتار کرلیا، گاڑی کسٹمز کے ویئر ہاؤس منتقل کردی گئی ہے۔
کسٹمز ذرائع کے مطابق لندن سے چوری ہونے والی گاڑی مشرقی یورپی ملک کے سفیر کے نام پر منگوائی گئی، سفارتی سطح پر چوری کی گاڑی برآمد گی کا علم ہونے پر ملک نے اپنا سفیر واپس بلوالیا۔
سوشل میڈیا پر کروڑوں کی گاڑی پر صارفین تبصرے کر رہے ہیں۔
ایک صارف نے لکھا کہ یہ دیکھنا باقی رہ گیا تھا۔
ایک صارف نے طنزیہ طور پر لکھا کہ ملک کا نام روشن کرنے کا بہت بہت شکریہ۔
ایک صارف نے غصے بھرے انداز میں اس معاملے پر تبصرہ کیا کہ یہ ملک میں کرپشن کی سطح کو ظاہر کررہا ہے۔