لاہور کے علاقے لاری اڈا سے نزدیک آج ایک افسوسناک واقعہ پیش آیا جہاں ایک سالگرہ کی تقریب میں ایک قیملی نے تیزاب ملا پانی پی لیا جس کے بعد ان کی حالت خراب ہوگئی اور انہیں فوری طور پر اسپتال منتقل کر دیا گیا۔
رپورٹ کے مطابق مقامی شہری عادل نے لاری اڈا پولیس میں اس واقعے کا مقدمہ درج کراتے ہوئے بتایا کہ گریٹر اقبال پارک میں واقع ایک پرائیوٹ ریستوران میں پانی پینے اور استعمال کرنے سے میرے بھتیجے اور بھانجی کی حالت بگڑ گئی۔
بھتیجے احمد کا ہاتھ پانی سے دھلوایا گیا تو اس کا ہاتھ جھلس گیا جب کہ ڈھائی سالہ وجیہہ کو پانی پلایا تو اس کی حالت غیر ہو گئی۔
ایف آئی آر کے مطابق مدعی مقدمہ نے بتایا کہ پانی میرے کزن احسن کے ہاتھ اور پاؤں پر بھی گرا، جس سے جسم پر چھالے بن گئے۔ واقعے کے فوراً بعد بچوں کو طبی امداد کے لیے اسپتال منتقل کیا گیا، جہاں ان کی حالت خطرے سے باہر بتائی جاتی ہے۔ ترجمان لاہور پولیس کے مطابق حکام نے ذمے داروں کے خلاف فوری کارروائی کی ہدایت کردی ہے جب کہ مقدمہ درج کیے جانے کے بعد نجی ہوٹل کے منیجر کو گرفتار کرلیا گیا ہے۔
پولیس ذرائع کا کہنا ہے کہ نجی ریستوران میں موجود پانی کی بوتل میں مبینہ طور پر تیزاب ملایا گیا تھا۔ پانی پینے سے بچے کا منہ اور گلے کی نالیاں جھلس گئیں۔ تمام پہلوؤں کو مدنظر رکھتے ہوئے تحقیقات شروع کردی گئی ہے۔