اسلام آباد: وفاقی وزیر اطلاعات و نشریات مریم اورنگزیب نے کہا ہے جسٹس اطہر من اللہ کا فیصلہ عدالتی کارروائی پر سوالیہ نشان ہے، جب پٹیشن مستر د ہو گئی تو اس پر بینچ کیسے بنا ؟
انہوں نے پریس کانفرنس سے خطاب کرتے ہوئے کہا سپریم کورٹ کے چار ججز نے کہا کہ معاملے پر فل کورٹ بنایا جائے، سیاسی جماعتوں نے بھی فل کورٹ بنانے کا مطالبہ کیا۔
پاکستان مسلم لیگ (ن) کی مرکزی ترجمان مریم اورنگزیب نے کہا یہ معاملہ بالکل الیکشن کا نہیں ہے، سیاسی جماعتیں الیکشن سے نہیں بھاگتیں، الیکشن کے وہ فیصلے جو مسلط کیے جائیں وہ ناقابل قبو ل ہیں۔
مریم اورنگزیب نے کہا یہ الیکشن کا نہیں بینچ فکسنگ کا معاملہ ہے جس پر اطہر من اللہ نے سوالات اٹھائے ہیں، یہ واردات دو پہلوؤں سے ہو رہی تھی، اس کا ایک سیاسی پہلو ہے اور دوسرا عدالتی پہلو ہے۔
وفاقی وزیر اطلاعات و نشریات استفسار کیا جس فیصلے کو سپریم کورٹ کے اکثر ججز بھی نہ مانیں وہ عوام کیسے مانیں؟ جسٹس اطہر من اللہ کا نوٹ اس بات کی نشاندہی کرتی ہے کہ یہ مسترد شدہ پٹیشن تھی۔
پریس کانفرنس سے خطاب کرتے ہوئے مریم اورنگزیب نے استفسار کیا کیوں جھوٹ بولا گیا کہ ججز نے اپنے آپ کو علیحدہ کیا ہے؟ ملک کی تاریخ میں کبھی ایسا فیصلہ نہیں ہوا۔