اسلام آباد: پاکستان مسلم لیگ (ن) کی چیف آرگنائزر مریم نواز نے کہا ہے کہ ہم سپریم کورٹ کا احترام کرتے ہیں، ہم آئین بنانے والے ہیں اس لیے دستور کا احترام کرتے ہیں۔
انہوں نے حکمران سیاسی جماعتوں کے اتحا پاکستان ڈیموکریٹک موومنٹ (پی ڈی ایم ) کے زیر اہتمام سپریم کورٹ کے باہر منعقدہ احتجاجی دھرنے سے خطاب کرتے ہوئے براہ راست استفسار کیا چیف جسٹس صاحب! عوام کے اس سمندر کو دیکھ کر خوشی ہوئی یا نہیں؟
مریم نواز نے کہا ہم ججوں اور قانون کا احترام کرتے ہیں، ہم یہاں پر احتجاج نہیں کرنا چاہتے تھے، پاکستان کی تباہی بھی ججوں کے فیصلوں سے ہوئی ہے، آج عمران خان کی سہولت کاری کرنے والوں کی بات ہوگی، سپریم کورٹ سے جمہوریت کو مضبوط کیا جانا چاہیے تھا۔
ن لیگ کی چیف آرگنائزر نے کہا فتنہ اور انتشار پھیلانے والوں کو انجام تک پہنچانے کی ذمہ داری عدلیہ کی تھی، 60 ارب روپے کا مجرم عدالت پیش ہوتا ہے تواس کو کہا جاتا ہے آپ سے مل کر بہت خوشی ہوئی۔