انڈیا کی شمال مشرقی ریاست آسام کے وزیر اعلی ہمنتا بسوا سرما نے سبزیوں کی قیمت کے لیے میاں برادری یا مسلسمانوں کو ذمہ دار ٹھہریا تو اسدالدین اویسی نے انھیں تنقید کا نشانہ بنایا
انڈیا کی شمال مشرقی ریاست آسام کے وزیر اعلیٰ ہمنتا بسوا سرما نے پوری ریاست اور خصوصاً دارالحکومت گوہاٹی میں سبزیوں کی قیمتوں میں اضافے کے لیے ’میاں مسلم‘ تاجروں کو ذمہ دار ٹھہرایا ہے۔
ان کے اس بیان کو مسلمانوں کو نشانہ بنانے کی ان کی ایک اور کوشش کے طور پر دیکھا جا رہا ہے اور بعض حلقوں کی جانب سے اس بارے میں سخت تنقید کی جا رہی ہے۔
آسام کی ایک اہم پارٹی آل انڈیا یونائیٹڈ ڈیموکریٹک فرنٹ (اے آئی یو ڈی ایف) کے سربراہ اور رکن پارلیمان بدرالدین اجمل نے اسے افسوسناک قرار دیا ہے۔
جبکہ آل انڈیا مجلس اتحاد المسلمین (اے آئی ایم آئی ایم) کے سربراہ اور رکن پارلیمان اسدالدین اویسی نے ہمنتا بسوا سرما کو سخت تنقید کا نشانہ بنایا ہے۔
آسام کے وزیر اعلی نے کیا کہا؟
آسام کے وزیر اعلی اور بی جے پی رہنما ہمنتا بسوا سرما اپنے متنازع اور مسلم مخالف بیانات کے لیے جانے جاتے ہیںجب صحافیوں کی جانب سے سبزیوں کی آسمان چھوتی قیمتوں کے بارے میں سوال کیا گیا تو وزیر اعلیٰ نے کہا کہ 'اس وقت جن لوگوں نے سبزیوں کی اتنی زیادہ قیمت کر رکھی ہے وہ کون لوگ ہیں؟ میاں تاجر ہیں، جو زیادہ قیمت پر سزیاں فروخت کر رہے ہیں۔'
آسام میں 'میاں' کا لفظ اکثر بنگالی نژاد مسلمانوں کے لیے استعمال ہوتا ہے جبکہ بہار، اترپردیش اور دیگر جگہ عام طور پر مسلمانوں کے لیے ہوتا ہے۔ واضح رہے کہ آسام میں بنگالی نژاد مسلمانوں کی ایک بڑی آبادی ہے جو کھیتی باڑی کرتی ہے اور سبزیوں اور مچھلیوں کا کاروبار کرتی ہے۔
اس سے پہلے آل انڈیا یونائیٹڈ ڈیموکریٹک فرنٹ کے صدر اور لوک سبھا کے رکن بدرالدین اجمل نے کہا تھا کہ آسام 'میاں' برادری کے بغیر نامکمل ہے۔
اجمل کے اس بیان پر وزیر اعلیٰ سرما نے کہا کہ اجمل نے اس طرح کے ریمارکس کرکے حقیقت میں آسامی برادری کی توہین کی ہے۔
وزیر اعلیٰ نے کہا: 'میاں تاجر گوہاٹی میں آسامی لوگوں سے سبزیوں کے لیے زیادہ قیمت وصول کر رہے ہیں، جب کہ گاؤں میں سبزیوں کی قیمت کم ہے۔ اگر آسامی تاجر آج سبزیاں بیچ رہے ہوتے، تو وہ اپنے آسامی لوگوں سے کبھی زیادہ قیمت وصول نہ کرتے۔'
وزیر اعلیٰ نے آسام کے نوجوانوں سے کہا کہ وہ آگے آئیں اور ان کاموں میں بڑھ چڑھ کر حصہ لیں۔
انھوں نے یقین دلایا کہ وہ ذاتی طور پر خالی کرائے گئے فلائی اوور کے نیچے بازار کی جگہ حاصل کریں گے، تاکہ آسامی لڑکوں کو روزگار کے مواقع مل سکیں۔ اس وقت گوہاٹی کے فلائی اوور کے نیچے سبزیاں اور پھل بیچنے والے زیادہ تر لوگ میاں برادری کے مسلمان ہیں۔
وزیر اعلیٰ نے کہا: 'ہم سب نے دیکھا ہے کہ عید کے دوران گوہاٹی شہر میں بسوں کی آمدورفت کیسے کم ہو جاتی ہے۔ بھیڑ کم دکھائی دیتی ہے۔ کیونکہ زیادہ تر بس اور کیب ڈرائیور میاں برادری سے ہیں۔'
اسدالدین اویسی حیدرآباد سے تین بار رکن پارلیمان رہ چکے ہیںحزب اختلاف کی تنقید
حیدرآباد (دکن) سے رکن پارلیمان اسدالدین اویس نے بی بی سی ہندی کی خبر کے جواب میں لکھا کہ 'ملک میں ایک ایسی منڈلی ہے جس کے گھر میں اگر بھینس دودھ دینا بند کر دے یا مرغی انڈا نہ دے تو اس کا الزام بھی میاں جی پر ہی لگا دیں گے۔ شاید اپنی 'نجی' ناکامیوں کا ٹھیکرا بھی میاں بھائی کے سر ہی پھوڑتے ہوں گے۔ آج کل مودی جی کی بیرون ملک کے مسلمانوں سے گہری یاری چل رہی ہے، انھی سے کچھ ٹماٹر، پالک، آلو وغیرہ مانگ کر کام چلا لیجیے۔'
یہ بھی پڑھیے
آسام: مسلمانوں پر ’فلڈ جہاد‘ شروع کرنے کے جھوٹے الزامات لگائے گئے
آسام میں مدارس مسمار کرنے کا معاملہ
خیال رہے کہ ابھی حال ہی میں انڈین وزیرِ اعظم نے مصر کا دورہ کیا تھا جہاں انھیں وہاں کے اعلی ترین اعزاز 'آرڈر آف دی نائل' سے سرفراز کیا گیا تھا۔ جبکہ اس سے قبل انھیں سعودی عرب سے بھی اعلی ترین شہری اعزاز دیا جا چکا ہے۔ فی الحال وہ فرانس کے دورے کے بعد ابھی متحدہ عرب امارات کے دورے پر ہیں۔
دوسری جانب کانگریس پارٹی کی آسام یونٹ نے ریاست میں سبزیوں کی قیمتوں میں اضافہ پر آسام حکومت کو تنقید کا نشانہ بنایا ہے اور حکومت پر زور دیا ہے کہ وہ سبزیوں کی قیمتوں کو کم کرنے کے لیے مؤثر اقدامات کرے۔
انڈیا میں ان دنوں سبزیوں اور بطور خاص ٹماٹر کی قیمتیں آسمان چھو رہی ہیں اور متعدد ریاستوں سے ٹماٹروں کی چوری کی بھی خبریں آ رہی ہیں۔ دارالحکومت دہلی میں گذشتہ روز جب ہم نے ٹماٹر کے بھاؤ پوچھے تو وہ 60 روپے پاؤ تھے جبکہ اس سے دو دن قبل وہ 40 کے پاؤ تھے۔ دکاندار نے کہا کہ انھوں نے اپنی زندگی میں کبھی اتنا مہنگا ٹماٹر نہ منڈی سے خریدا ہے اور نہ لوگوں کو فروخت کیا ہے۔
سرما کے بیان پر سوشل میڈیا
صحافی عزیر رضوی نے ٹویٹ کرتے ہوئے لکھا کہ 'انڈیا کی ایک شمال مشرقی ریاست کے وزیر اعلیٰ ہمنتا بسوا نے مبینہ طور پر ریاست میں سبزیوں کی قیمتوں میں اضافے کا ذمہ دار مسلمانوں کو ٹھہرایا ہے۔
'نازی جرمنی میں معاشی بحران اور افراط زر کا ذمہ دار یہودیوں کو ٹھہراتے تھے۔'
سبزیوں کی قیمت میں اضافے کا سبب بتاتنے ہوئے کیٹلیا نامی صارف نے لکھا کہ ’ماہرین کہتے ہیں کہ خراب موسم نے فصلوں کو تباہ کیا ہے جس کی وجہ سے بازار میں کمی ہے اور یہ مانگ اور فراہمی میں عدم مطابقت کے سبب ہے۔ لیکن ہمنتا کہتے ہیں کہ اس کا سبب 'میاں مسلم' ہیں۔‘
https://twitter.com/RizviUzair/status/1679860201464143874
کوسٹا نامی صارف نے لکھا کہ 'یہ غیر تعلیم یافتہ ہیمنتا ناکام وزیر اعظم مودی اور وزیر خزانہ سیتارمن کو تنقید کرنے کے بجائے مسلمانوں کی تنقید کر رہے ہیں۔'
شکیب شرافت نامی ایک صارف نے لکھا: ’واہ، بڑے مزے کی بات ہے کہ وزیر اعلی نے سبزیوں کی قمیت میں اضافے کا ذمہ دار مسلمانوں کو ٹھہرایا ہے۔ اگر سبزیوں کی قیمت گرنے لگے تو وہ کیا کہیں گے؟‘
اس سے قبل رواں سال مئی کے مہینے میں ہمنتو بسوا سرما نے 'فرٹیلائزر جہاد' کے تحت مسلم کسانوں کو نشانہ بنایا تھا۔
سرما نے گوہاٹی میں نیچر فارمنگ کے اجلاس سے خطاب کرتے ہوئے کہا: ’جب ہم نے آسام پر حکومت کرنا شروع کیا تو ہم نے عوام کو مطلع کیا کہ ریاست میں مختلف غذائی اشیاء میں کھادوں کے زیادہ استعمال کی وجہ سے دل، گردے کی بیماریاں بڑھ رہی ہیں۔ انہوں نے کہا کہ ریاست ’کھاد کے جہاد کے خلاف‘ کام کر رہی ہے۔‘
https://twitter.com/catale7a/status/1680031931579400192
ویب سائٹ سکرول نے اس بابت لکھا کہ ’اگرچہ 'لو جہاد' ہندو بالادستی کی خواہاں تنظیموں کی طرف سے پیش کیا گیا ایک سازشی نظریہ ہے جس کا دعویٰ ہے کہ یہ مسلمان مردوں کی طرف سے ہندو خواتین کو ورغلانے اور انھیں اسلام قبول کرنے کی ایک منظم سازش ہے۔
’اسی طرح 'لینڈ جہاد' سے مراد مسلمانوں کی طرف سے سرکاری زمین پر قبضہ کرنے کی حکمت عملی ہے۔ اسی طرح پچھلے سال آسام کے سلچر میں آنے والے سیلاب کے بعد سوشل میڈیا اکاؤنٹس پر 'فلڈ جہاد' جہاد کا ذکر کیا گیا اور کہا گیا کہ دریا کے ایک پشتے کو تباہ کرنے کی وجہ سے ایسا ہوا۔‘
سکرول نے لکھا کہ ’آسام کے وزیر اعلیٰ کا چونکا دینے والا نئے 'فرٹیلائزر جہاد' کی اختراع بڑے پیمانے پر ریاست کے بنگالی مسلم سبزی کاشتکاروں کو ایک مذموم سازش سے جوڑتی دکھائی دیتی ہے۔‘
