وزیراعظم کے مشیر برائے سیاسی امور رانا ثنا اللہ نے کہا ہے کہ پی ٹی آئی کا لانگ مارچ مؤخر ہونے تک حکومت اور تحریک انصاف کے درمیان مذاکرات نہیں ہوسکتے تاہم پارٹی قیادت سے پسِ پردہ رابطے برقرار ہیں۔
رانا ثنا اللہ نے کہا کہ اسلام آباد میں کنٹینرز حفاظتی اقدامات کے تحت رکھے گئے ہیں سڑکیں کھلی ہیں اور کنٹینرز سڑکوں کے کنارے موجود ہیں۔ ان کا کہنا تھا کہ پی ٹی آئی کی جانب سے لانگ مارچ سے متعلق صرف بیانات دیے جا رہے ہیں عملی طور پر مارچ نہیں ہوگا۔
وزیراعظم کے مشیر نے واضح کیا کہ اسلام آباد میں کسی کو بھی زبردستی داخل ہونے یا شہر میں چڑھ دوڑنے کی اجازت نہیں دی جائے گی۔ ان کے مطابق حکومت امن و امان برقرار رکھنے کے لیے ضروری اقدامات کر رہی ہے۔
رانا ثنا اللہ نے مزید کہا کہ اگر صوبائی حکومت نے وفاقی حکومت کے پولیس ایکٹ میں تبدیلی کی تو پارلیمنٹ اسے ختم کرسکتی ہے جبکہ یہ معاملہ آئینی عدالت میں بھی چیلنج کیا جاسکتا ہے۔