بلوچستان میں نگراں وزیراعلیٰ کے تقرر کا معاملہ بالآخر طے پا گیا ہے اور میر علی مردان خان ڈومکی کے بطور نگراں وزیراعلٰی تقرری کی منظوری دے دی گئی ہے۔
گورنر سیکریٹریٹ کے ایک سینیئر افسر نے اُردو نیوز سے بات کرتے ہوئے تصدیق کی کہ ’گورنر بلوچستان ملک عبدالولی کاکڑ نے سپیکر کی جانب سے بھیجی گئی سمری پر دستخط کرکے علی مردان ڈومکی کے بطور نگراں وزیراعلٰی تقرری کی منظوری دے دی ہے۔‘انہوں نے بتایا کہ سپیکر بلوچستان اسمبلی نے گورنر کو آگاہ کیا تھا کہ پارلیمانی کمیٹی نے اکثریت رائے سے نگراں وزیراعلٰی کے لیے علی مردان ڈومکی کے نام پر اتفاق کرلیا ہے۔علی مردان ڈومکی سابق گونر اور سابق وزیراعلٰی بلوچستان نواب اکبر خان بگٹی کے نواسے اور سابق سینیٹر میر حضور بخش ڈومکی کے صاحبزادے ہیں۔ان کا نام جمعیت علمائے اسلام سے تعلق رکھنے والے قائد حزب اختلاف ملک سکندر ایڈووکیٹ نے پارلیمانی کمیٹی کو تجویز کیا تھا۔میر علی مردان خان ڈومکی سابق سینیٹر حضور بخش ڈومکی کے بیٹے اور نواب اکبر خان بگٹی کے نواسے ہیں۔اُن کا تعلق بلوچستان کے ضلع سبی کے علاقے لہڑی کے معروف سیاسی گھرانے سے ہے۔ وہ 13 اکتوبر 1972ء کو پیدا ہوئے۔ ان کے والد میر حضور بخش ڈومکی 1975 سے 1977 تک سینیٹر رہے۔علی مردان ڈومکی نے علامہ اقبال یونیورسٹی اسلام آباد سے سوشیالوجی میں ماسٹرز کیا۔ وہ 2002ء میں تحصیل لہڑی کے بلا مقابلہ ناظم منتخب ہوئے اور 2005ء تک اس عہدے پر فائز رہے جبکہ 2005ء سے 2010ء تک ضلع ناظم سبی رہے۔ علی مردان کے بھائی میر دوستین ڈومکی 2013ء میں کوہلو سبی ڈیرہ بگٹی سے رکن قومی اسمبلی بنے اور شاہد خاقان عباسی کی کابینہ میں وزیر مملکت سائنس و ٹیکنالوجی رہے ہیں۔