ضلعی انتظامیہ کی جانب سے اسلام آباد میں نئے سال کی تقریبات، میوزیکل نائٹ اور آتشبازی کے اجازت نامے منسوخ کر دیے گئے۔ضلعی انتظامیہ نے ایکس (سابقہ ٹوئٹر) پر ایک بیان میں کہا ہے کہ ’نگراں وزیراعظم انوارالحق کاکڑ کی جانب سے فلسطینیوں سے اظہار یکجہتی کے پیش نظر نیو ایئر نائٹ کی تقریبات پر پابندی پر عمل درآمد کا آغاز کر دیا گیا ہے۔‘ڈی سی اسلام آباد عرفان میمن نے شہریوں سے گزارش کی ہے کہ حکومتی فیصلے کے پیش نظر کسی بھی قسم کی تقریبات کے انعقاد سے گریز کیا جائے۔’اس حوالے سے متعلقہ اسسٹنٹ کمشنرز کو ہدایات جاری کر دی گئی ہیں کہ وہ حکومتی احکامات پر عملدرآمد کو یقینی بنائیں۔‘نگران وزیراعظم انوارالحق کاکڑ کی جانب سے فلسطینیوں سے اظہار یکجہتی کے پیش نظر نیو ائیر نائٹ کی تقریبات پر پابندی پر عمل درآمد کا آغاز کر دیا گیا ہے،ضلعی انتظامیہ اسلام آباد کی جانب سے نئے سال کی تقریبات، میوزیکل نائٹس،فائیر ورکس وغیرہ کے لیے دئیے گئے اجازت نامے منسوخ کر دئیے گئے
— Office of Deputy Commissioner Islamabad (@dcislamabad) December 29, 2023
جمعرات کو پاکستان کے نگراں وزیراعظم انوارالحق کاکڑ نے فلسطینیوں سے اظہار یکجہتی کے لیے حکومت پاکستان کی طرف سے نئے سال کے موقع پر کسی بھی قسم کی تقریب کے انعقاد پر مکمل پابندی کا اعلان کیا تھا۔ایک خصوصی ویڈیو پیغام میں نگراں وزیراعظم نے پاکستانی عوام سے اپیل کی تھی کہ ’غزہ کے مظلوم عوام کے ساتھ یکجہتی کا مظاہرہ کریں اور نئے سال کے آغاز پر سادگی کو ملحوظ خاطر رکھیں۔‘انہوں نے کہا تھا کہ فسلطینیوں کی امداد، زخمیوں کے انخلا اور ان کے علاج کے لیے حکومتِ پاکستان مصر اور اُردن کے ساتھ مسلسل رابطے میں ہے۔